Лідарка дэмакратычных сіл Беларусі Святлана Ціханоўская 3 кастрычніка наведала Беласток. Гэты горад увайшоў у чатырохдзённы візіт Ціханоўскай у Польшчу. MOST расказвае, чым займалася Ціханоўская ў Белсатоку.
Прыезд у Беласток лідаркі дэмакратычных сіл быў прымеркаваны да прэзентацыі кнігі «Lodołamaczka». Яе напісаў журналіст польскай газеты «Rzeczpospolita» і калумніст «Белсата» Руслан Шошын. «Lodołamaczka» — неўласцівая для польскай мовы жаночая форма слова «lodołamacz» («ледакол»), аўтарскі наватвор для апісання Святланы Ціханоўскай.
Сустрэча з прэзідэнтам
Візіт у Беласток Ціханоўская пачала з сустрэчы з прэзідэнтам горада Тадэвушам Трускаляскім і прадстаўнікамі беластоцкага мясцовага самакіравання. На сустрэчы ўздымалася тэма новай вуліцы ў Беластоку, названай у гонар Вольнай Беларусі, і яе афіцыйнага адкрыцця. Таксама Ціханоўская ўзняла пытанні, звязаныя з беларусамі, якія жывуць у Беластоку.
Прэзентацыя кнігі
Прэзентацыя кнігі, прысвечанай Ціханоўскай, прайшла ў Падляскай бібліятэцы імя Лукаша Гурніцкага. Там адбылася сустрэча Святланы Ціханоўскай і аўтара кнігі Руслана Шошына з беларусамі і прадстаўнікамі польскіх медыя. На сустрэчы ў бібліятэцы лідарку дэмакратычных сіл Беларусі называлі прэзідэнткай, якая выйграла выбары ў 2020 годзе ў Беларусі.
Ціханоўская падзякавала людзям, што прыйшлі на сустрэчу, а таксама аўтару і выдавецтву. Адзначыла, што кнігу яшчэ не чытала, бо не ведае польскую мову, і чакае пераклад на беларускую.
— Гэта гісторыя не пра мяне, гэта гісторыя пра кожнага беларуса. Кніга зроблена, каб жыхары Польшчы прачыталі і зразумелі, што было ў Беларусі да 2020 года і пасля.
Падчас прэзентацыі абмяркоўвалі падзеі ў Беларусі ў 2020 годзе, выказванні Ціханоўскай у адрас Расіі і Пуціна. Размаўлялі пра Сяргея Ціханоўскага, які больш за два гады знаходзіцца ў турме.
Ад 28 верасня кніга «Lodołamaczka» з’явілася ў найбуйнейшых кнігарнях Польшчы.
Сустрэча с рэдакцыяй MOST
Пасля прэзентацыі Святлана Ціханоўская наведала рэдакцыю MOST. Яна падзякавала журналістам за працу і ўнёсак у вольную Беларусь і падарыла экзэмпляр кнігі «Lodołamaczka» з аўтографам.
Рэдакцыя MOST у сваю чаргу падарыла лідарцы малюнак з выявай беларускіх журналістаў, якія працуюць у Беластоку, а таксамі кнігі Руслана Кулевіча, у якіх сабраныя ўспаміны жыхароў Гродна 1920-30-х гадоў.
Сустрэча ў «Радыё Рацыя» з арганізацыямі Падляшша
Напрыканцы візіту ў Беласток Святлана Ціханоўская сустрэлася з прадстаўнікамі беларускіх грамадскіх арганізацый Падляшша і прадстаўнікамі «Радыё Рацыя». Там лідарка дэмакратычнай Беларусі расказала пра стварэнне пераходнага Аб’яднанага кабінета Беларусі.
— Лічу, што гэта была выдатная ідэя, якая перш за ўсё паказвае адзінства і тое, што ёсць у дэмакратычных сілаў структура. Перш за ўсё гэта быў адказ на тое, што пачалася вайна, і мы бачым, як наша незалежнасць здаецца крок за крокам. Каб выпрацаваць падыходы па захаванні і абароне незалежнасці, павінна ісці праца ў шматлікіх напрамках. І стварэнне пераходнага кабінета вельмі добра ўспрынялася сярод беларусаў у Беларусі і таксама нашымі замежнымі партнёрамі, — расказала Ціханоўская падчас размовы ў «Радыё Рацыя». Больш падрабязна пра гэта можна прачытаць тут.
Пасля Беластока Ціханоўская адправілася ў Варшаву. Там 4 кастрычніка яна бярэ ўдзел у дыскусіях на Варшаўскім форуме па бяспецы («Warsaw Security Forum»), сустракаецца з прэзідэнтам Польшчы, а таксама ўдзельнічае ў шэрагу закрытых пасяджэнняў Аб’яднанага пераходнага кабінета.
