Амаль за месяц збору подпісаў у падтрымку арганізацыі заняткаў беларускай мовы атрымалася сабраць 44 заявы. 14 лістапада іх перадалі ў канцылярыю Дэпартамента адукацыі ў Беластоку.
Падпісаць зварот маглі беларускія бацькі, якія жывуць у Польшчы і маюць дзяцей школьнага або перадшкольнага ўзросту.
— Мы перадалі 44 заяўкі ад бацькоў, якія хацелі б вучыць сваіх дзяцей беларускай мове. Па нашай інфармацыі, справу будзе разглядаць кіраўнік па справах арганізацыі школ пані Сенденецка (p. Sendenecka). Таксама запэўнілі, што афіцыйны адказ пра магчымую форму арганізацыі навучання дадуць хутка, цягам двух тыдняў.
Шэсць заяваў не прынялі, паколькі яны не былі падпісаныя. Але гэтыя звароты не прападуць. Іх, канешне, трэба падпісаць, і тады мы далучым іх да справы пазней, — распавяла MOST настаўніца беларускай мовы, прадстаўніца беларускай дыяспары Беластока Ганна Дар.
Пасля атрымання адказу ад Дэпартамента адукацыі ў Беластоку ў MediaPortBelarus будзе арганізаваны бацькоўскі сход.
Забяспечыць дзяцей заняткамі беларускай мовай
Мэта кампаніі па зборы подпісаў — арганізаваць заняткі беларускай мовы ў польскіх школах. Беларускую мову ў Беластоку з усіх школ цяпер выкладаюць толькі ў чацвёртай. Прычым вывучаць яе могуць толькі прадстаўнікі беларускай нацыянальнай меншасці — тыя дзеці, чые бацькі маюць польскае грамадзянства і лічаць сябе беларусамі.
У апошняй хвалі эміграцыі ў Польшчы апынуліся беларусы, якія хацелі б забяспечыць дзяцей заняткамі беларускай мовы. Але яны не маюць польскага грамадзянства, таму не могуць накіраваць дзяцей у беластоцкую школу №4 з магчымасцю вучыць беларускую мову.
Збор подпісаў працягваецца
Калі вы хочаце далучыцца да кампаніі па зборы подпісаў, то яшчэ можна запоўніць заяву і прынесці ў MediaPortBelarus у Беластоку па адрасе Sienkiewicza 44. Можна таксама падпісаць заяву адразу на месцы — раздрукаваныя формы чакаюць вас.
