Хаб «Новая зямля» прыняў сустрэчу 11 студзеня. На імпрэзе абмеркавалі адказ дэпартамента адукацыі і дзяліліся, як захоўваць беларускасць у дзецях, што апынуліся ў Польшчы.
Ідзе праца з гарадскімі ўладамі
Адна з ініцыятарак збору подпісаў за арганізацыю ўрокаў беларускай мовы Ганна Дар расказала пра адказ на зварот ад дэпартамента адукацыі Беластока. Улады адказалі, што разумеюць праблему: па цяперашнім заканадаўстве ўрокі беларускай мовы мусяць арганізоўваць толькі для тых дзяцей, у якіх хаця б адзін з бацькоў мае польскае грамадзянства. Таму ўлады запланавалі сустрэчу для абмеркавання праблемы, на якой будуць удзельнічаць прадстаўнікі дэпартамента адукацыі Беластока, міністэрства адукацыі з Варшавы і адміністрацыі ваяводства. Гэтая сустрэча мае адбыцца 18 студзеня.
Пасля гэтай сустрэчы будзе зразумела, ці знайшлі ўлады магчымасць для арганізацыі ўрокаў. Калі ўлады змогуць фінансаваць заняткі з бюджэту, то ёсць спадзяванне, што ўрокі стартуюць яшчэ ў гэтым навучальным годзе.
Спадарыня Ганна падсумавала, што падчас збору подпісаў сабралі 44 заявы. У іх назвалі дзяцей рознага ўзросту з 19 школ Беластока.
Як беларуская мова дапаможа паступіць
Журналіст Зміцер Косцін падзяліўся досведам, як выхоўвае дзяцей беларусамі. Ён 15 год жыве ў Польшчы, хаця не планаваў заставацца на столькі год. Дзякуючы беларускай меншасці тут ужо былі магчымасці для захавання беларускасці. Напрыклад, яго дзеці хадзілі ў садок №14, дзе выхавальніцы размаўлялі па-беларуску. Далей дзеці могуць вучыцца ў школе №4, дзе ёсць урокі беларускай мовы.
Але важна, каб дзеці не толькі ведалі мову, але і паглыбляліся ў беларускую культуру і традыцыі, а на гісторыю мелі беларусаарыентаваны пункт гледжання. Для маленькіх беларусаў можна ладзіць экскурсіі па Падляшшы, гістарычныя вандроўкі, варштаты па зялярству і шмат іншага.
— На Беласточчыне ёсць частка беларускага свету, але мы вельмі мала ведаем пра беларускае на Беласточчыне. Было б добра, каб гэтыя дзве беларускасці сустрэліся, — мяркуе Косцін.
Веды беларускай мовы і культуры важныя не толькі для захавання нацыянальнай ідэнтычнасці. Штогод на Беласточчыне ладзяць ваяводскі конкурс беларускай мовы. Лаўрэаты гэтага конкурсу атрымліваюць магчымасць паступаць у любы ліцэй і не баяцца вынікаў экзаменаў васьмікласнікаў. Гэта асабліва актуальна для дзяцей, якія польскую мову вучаць год-два, а экзамены здаюць такія самыя, што і іх аднакласнікі палякі. Конкурс стартуе ў кастрычніку. Каб удзельнічаць у ім, трэба пра гэта паведаміць у школе.
Кафедра беларусістыкі Варшаўскага ўніверсітэта ладзіць алімпіяду па беларускай мове, лаўрэаты якой праходзяць без экзаменаў на гуманітарныя кірункі ўстановы.
Вазьміце кнігу ў бібліятэцы
Юлія Гаруновіч расказала пра ініцыятыву «Скрынка скарынкі». Гэта бібліятэка беларускіх дзіцячых кніг. Любы можа напісаць Юліі і дамовіцца, як атрымаць кнігу на месяц. А таксама яна заклікае далучацца да ініцыятывы і папаўняць бібліятэку кнігамі. Пабачыць асартымент бібліятэкі і заказаць кнігу можна тут.
Калі вы хочаце далучыцца да ініцыятывы па захаванні беларускасці ў дзяцей, далучайцеся да Беларускай дыяспары Беластока.
