Беларуска Наталля Грынь жыве ў Польшчы і ездзіць ва Украіну з гуманітарнай дапамогай. Падчас чарговай паездкі яна знікла на ўкраінскай тэрыторыі, родныя і сябры не маглі знайсці Наталлю некалькі дзён. Што з ёй здарылася, перадае «Радыё Свабода».
Наталля супрацоўнічае з фондам, які возіць гуманітарную дапамогу з Польшчы ў Харкаў. Мае адпаведныя дакументы. Першы раз, калі Наталля ездзіла з камандай у Харкаў і вярталася ў Польшчу, да яе не было ніякіх прэтэнзій. Непрыемныя прыгоды пачаліся падчас другой паездкі.
«29 ліпеня мая каманда паехала ў Польшчу, а я засталася ў Кіеве, каб вырашыць свае асабістыя пытанні. Потым села на аўтобус Кіеў – Варшава і паехала. Аўтобус па дарозе зламаўся, у выніку мы ехалі да мяжы каля 23 гадзін. Заставалася недзе хвілін дваццаць, калі аўтобус спынілі на блокпасту вайскоўцы. У іх узніклі пытанні да мяне, бо я мела беларускі пашпарт і ў ім рэгістрацыю ў Луганскай вобласці. Мяне знялі з аўтобуса і перадалі паліцыі», — расказала валанцёрка.
Наталля кажа, што жыла ва Украіне да пачатку поўнамаштабнай вайны. Каб працягнуць часовы дазвол на жыхарства, замежным грамадзянам ва Украіне трэба мець рэгістрацыю. Наталля зарэгістравалася ў сваякоў у паселішчы Крамянная Луганскай вобласці (цяпер яно пад расійскай акупацыяй).
Пасля затрымання, з яе слоў, Наталлю прывезлі ў львоўскую паліцыю і пасадзілі ў камеру. Жанчына прабыла за кратамі з вечара суботы да вечара аўторка. Беларуска кажа, што першы допыт пачаўся ў панядзелак. Паліцыю цікавіла, чаму ўкраінскія сваякі Наталлі засталіся пад акупацыяй. А таксама што яна ведае пра сітуацыю ў Беларусі і «вагнераўцаў».
Тым часам муж і сябры Наталлі пачалі яе шукаць, публікацыі аб знікненні жанчыны з’явіліся ў беларускіх недзяржаўных СМІ. У паліцэйскі пастарунак прыйшлі знаёмыя Наталлі.
У выніку ўвечары 1 жніўня яе адпусцілі, не даўшы ніякіх дакументаў.
