Намеснік міністра ўнутраных спраў і адміністрацыі Польшчы Мацей Вонсік (Maciej Wąsik) лічыць, што правакацыі з боку Беларусі — гэта спроба дэстабілізаваць сітуацыю ў Польшчы перад парламенцкімі выбарамі.
«Мы пастаянна сочым за сітуацыяй на польска-беларускай мяжы і бярэм пад увагу факт, што Лукашэнка, хутчэй за ўсё, паспрабуе ўмяшацца ў выбары ў Польшчы дэстабілізуючы сітуацыю ў краіне, напрыклад, шляхам рознага роду правакацый», — сказаў ён у эфіры Польскага радыё.
У якасці прыклада ён прывёў беларускія верталёты, якія заляцелі ў паветраную прастору Польшчы.
«Калі беларускія верталёты зноў паляцяць, то павінна быць прынятая працэдура, выкладзеная ў міжнародным праве. Трэба адправіць сігналы, каб яны павярнулі назад, і даць ім зразумець, што яны знаходзяцца на iншым баку мяжы. Калі яны не рэагуюць на гэта, то толькі тады могуць быць прынятыя сілавыя меры», — падкрэсліў Вонсік.
Таксама Вонсіка спыталі, што адбудзецца, калі ПВК «Вагнер» пачне страляць па польскіх службах.
«Мы адкажам адэкватна», — адказаў ён, нагадаўшы, што ЗША і НАТА зазначылі, што напад вагнераўцаў будзе разглядацца як агрэсія Пуціна супраць краін НАТА.
