Дакументальная стужка «Радзіма», створаная беларускай камандай, трапіла ў шорт-ліст прэміі Еўрапейскай кінаакадэміі. Лаўрэатаў аб’явяць 9 снежня ў Берліне.
Рэжысёры «Радзімы» Аляксандр Міхалковіч і Ганна Бадзяка праз стужку даследуюць гвалт у беларускай арміі і грамадстве. У фільме разгортваюцца дзве паралельныя лініі: гісторыя маці, якая страціла сына, калі ён служыў у войску, і аповяд пра маладога хлопца, які толькі збіраецца ісці на службу.
Аўтары працавалі над стужкай чатыры гады, фінансавую падтрымку аказвалі кінаістытуты Швецыі, Нарвегіі і Украіны.
Днямі фільм паказалі на фестывалі Watch docs, які праходзіць у Варшаве з 1 па 10 снежня.
Як адзначыў Аляксандр Міхалковіч у інтэрв’ю Polskie Radio, у праграмы першых фестываляў, на якіх паказвалі фільм, стужку ўключалі разам з расійскімі фільмамі. Гэта вымусіла аўтараў напісаць антыкаланіяльны стэйтмэнт аб тым, што Беларусь — асобная дзяржава. Рэжысёры кажуць, што хацелі зрабіць свой унёсак у працэс дэкаланізацыі.
— Мы дамагліся свайго — нас зразумелі і перасталі так прадстаўляць.
Стваральнікі распавялі, што фільм не толькі пра Беларусь і сістэму, якая пануе ў нашай краіне. У ім ёсць і ўніверсальныя тэмы сталення і супраціву.
— Мы пачалі здымаць да вялікай эскалацыі — гаворым пра пратэсты 2020-га ці пра расійскую агрэсію супраць Украіны. Людзям цікава разабрацца ў гэтых прычынах, — кажа Аляксандр Міхалковіч.
Ганна Бадзяка дадае, што публіка рэагуе эмацыйна, плача, але гэта пераважна беларуская дыяспара. Сярод замежных гледачоў рэжысёрка часцей заўважае здзіўленне.
— Яны не ведалі пра маштаб рэпрэсій — у іх шмат цікаўнасці і пытанняў.
