Генеральны сакратарыят Інтэрпола пракаментаваў выкарыстанне яго механізмаў уладамі Беларусі для пераследу апанентаў за мяжой.
«Усе запыты, накіраваныя Нацыянальным цэнтральным бюро ў Мінску, старанна разглядаюцца на прадмет адпаведнасці правілам і працэдурам Інтэрпола», — адзначыла арганізацыя ў адказе на запыт «Радыё Свабода» пасля чарговага выпадку пераследу палітычных дысідэнтаў за мяжой.
Нагодай стала справа беларускага журналіста, рэжысёра і апазіцыйнага актывіста Андрэя Гнёта. Яго арыштавалі ўлады Сербіі ў кастрычніку 2023 года на падставе ордара Інтэрполу, выдадзенага на запыт Беларусі.
Гнёта вінавацяць ва ўхіленні ад выплаты падаткаў. Сам Гнёт гэта адмаўляе, лічачы, што рэжым Аляксандра Лукашэнкі пераследуе яго за палітычную дзейнасць. Паводле рашэння суда ў Сербіі, «усе законныя патрабаванні выкананыя», яму пагражае экстрадыцыя ў Беларусь. Канчатковае рашэнне чакаецца ў сакавіку.
«Ідэя таго, што нашы сістэмы не павінны выкарыстоўвацца ў палітычных мэтах, ляжыць у аснове нашага Статуту, і мы ганарымся тым, чаго дасягнулі, каб зрабіць нашы сістэмы мацнейшымі і менш адкрытымі для злоўжыванняў», — гаворыцца ў пісьмовым адказе Інтэрпола «Радыё Свабода».
Не адмаўляючы рызыкі злоўжыванняў, Інтэрпол адзначае, што арганізацыя пастаянна кантралюе і ўдасканальвае свае сістэмы, каб яны заставаліся максімальна эфектыўнымі.
«Падобна таму, як мы павінны быць пільнымі да змен у злачыннай дзейнасці, мы павінны рэагаваць на патэнцыяльнае злоўжыванне нашымі сістэмамі», — заявілі ў Генеральным сакратарыяце.
Галоўную адказнасць за тое, каб запыты краін-членаў на выдачу ордараў адпавядалі правілам Інтэрпола, нацыянальным заканадаўствам і міжнародным абавязкам, нясуць, як падкрэслена ў заяве, самі гэтыя краіны.
Адпаведнасць гэтых запытаў прынцыпам Інтэрпола дадаткова правярае орган Генеральнага сакратарыята, пасля чаго вырашаецца, ці будуць яны задаволеныя.
Беларуская апазіцыя патрабуе выключыць Беларусь з Інтэрпола. Арганізацыя былых сілавікоў «Белпол» разам з камандай Святланы Ціханоўскай накіравалі ў Інтэрпол ліст, у якім папрасілі спыніць супрацоўніцтва з беларускімі ўладамі ў сувязі з парушэннем прынцыпаў працы, прадугледжаных статутам гэтай міжнароднай арганізацыі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
