Сёння на пагранічным пераходзе «Варшаўскі мост» каля Тэрэспаля мае адбыцца антываенная акцыя беларусаў, якія цяпер жывуць у Польшчы. Да гэтага ўчора заклікаў прадстаўнік Народнага антыкрызіснага ўпраўлення Павел Латушка.
Прадстаўнік беларускай дыяспары ў Беластоку Ян Абадоўскі адзначыў:
— Вырашылі падтрымаць прапанову, таму што лічым, што сёння галоўная рэч — гэта салідарнасць. Беларуская дыяспара Беластоку за некалькі гадзін сабрала каманду тых, хто едзе на мяжу, каб падтрымаць украінскі народ. А таксама паказаць, што мы пратэстуем супраць вайны. Для нас цяпер самае галоўнае — паказаць, што беларусы не пагаджаюцца з вайной, якая адбываецца з тэрыторыі Беларусі ў тым ліку. Таму вырашылі далучыцца да закліку Латушкі.
На пытанне, чаго актывісты чакаюць ад беларускіх дэмакратычных лідараў, Абадоўскі адказаў:
— Больш радыкальных крокаў. Цяпер беларуская супольнасць павінна паказаць, што мы ўсе разам супраць вайны. Ужо мы заўважаем некаторыя рэчы супраць беларусаў — а як інакш, з тэрыторыі Беларусі ў тым ліку едуць расійскія войскі. Беларускі рэжым даў тэрыторыю для наступу. Калі б Беларусь была нейтральнай дзяржавай, расійскаму войску не было б так лёгка зайсці ва Украіну з нашага боку.
Калі беларусы замежжа маюць шмат магчымасцяў для антываенных выступаў, то як могуць паказваць пазіцыю тыя, хто цяпер унутры краіны?
— Беларусы ў Беларусі, якія лічаць важным паказаць, што супраць вайны, могуць знайсці спосабы, якія падыходзяць ім, — лічыць актывіст. — Хтосьці займаецца партызаншчынай – раскідвае ўлёткі, робіць надпісы, паказвае як можа, што мы супраць вайны. Выйсці на вуліцы ў Беларусі вельмі цяжка. Спадзяюся, што бліжэйшым часам адбудзецца страйк, людзі застануцца дома — і гэта пакажа, што яны пратэстуюць супраць вайны.
