Акцыю салідарнасці з Украінай зладзілі ў Беластоку 10 сакавіка. Мерапрыемства ініцыяваў прэзідэнт горада Тадэвуш Трускаляскі. Падчас сустрэчы на Рынку Касцюшкі луналі сцягі Украіны, Польшчы, Беластока, Еўрасаюза і нацыянальны сцяг Беларусі.
Пачалі імпрэзу з гімнаў Польшчы і Украіны.
Прэзідэнт горада Тадэвуш Трускаляскі заявіў, што ўдзельнікі сабраліся, каб паказаць, што Беласток і ўся Польшча — разам з украінскім народам, які без абвяшчэння вайны быў атакаваны два тыдні таму.
— Гэта вайна не толькі Украіны і ўкраінскага народу, — падзяліўся Трускаляскі. — Гэта вайна ўсяго свабоднага свету з варварствам, вайна ўсходу з захадам, вайна цывілізацыі жыцця з цывілізацыяй смерці. Хочам паказаць, што Польшча — другі дом для ўкраінскага народу.
Таму жыхары Беласточчыны перадаюць дапамогу ва Украіну, а таксама прымаюць у сябе ўцекачоў з краіны-суседкі, казаў Трускаляскі:
— За гэтыя цудоўныя жэсты салідарнасці хацеў бы сардэчна падзякаваць нашым жыхарам.
На вялікім экране, устаноўленым на Рынку Касцюшкі, паказалі зварот пасла Украіны ў Польшчы Андрэя Дэшчыцы да жыхароў Беластока:
«Гэтая вайна паказала, хто ёсць хто».
— Тая сардэчнасць і шчырасць, што сустрэлі ў Польшчы ўкраінцы, якія ўцякаюць ад расійскай арміі, — гэта пацвярджэнне таго, што мы можам і павінны будаваць будучыню і мір паміж нашымі народамі і мір на ўсім еўрапейскім кантыненце. Гэтая вайна паказала, хто ёсць хто. Некалі ўкраінцы бачылі расіян братамі, але ўсё змянілася, калі расійская армія пачала забіваць дзяцей, мірных людзей, знішчаць гарады і ўкраінскую інфраструктуру. Але мы знайшлі новую сястру — Польшчу, якая аказалася такой блізкай нашым людзям і духам, і сэрцам. Веру, што нашы агульныя высілкі прывядуць да міру і мірнай будучыні на карысць нашым народам.
На акцыі выступіў таксама футбаліст клуба «Ягелонія» Тарас Раманчук, які паходзіць з Украіны. Ён падзякаваў жыхарам Беластока і ўсёй Польшчы за дапамогу, якую арганізуюць для ўкраінцаў.
Беларусы Беластока разгарнулі на акцыі плакат «Не вайне!». Пра тое, чаму да мерапрыемства далучыліся беларусы, журналісту MOST расказаў прадстаўнік дыяспары Ян Абадоўскі:
— Хочам паказаць салідарнасць з украінскім народам і што не трэба ставіць знак роўнасці паміж беларусамі і Лукашэнкам. Беларусы, якія ў 2020 годзе масава выйшлі на мітынгі супраць Лукашэнкі, трапілі пад вялікія рэпрэсіі, цяпер больш за тысячу палітвязняў сядзяць за кратамі з вялізнымі тэрмінамі. Мы ладзім свае антываенныя акцыі і далучыліся да сённяшняй.
Таксама беларуская дыяспара Беластока тыдзень таму зладзіла збор сродкаў для ўкраінскай тэрытарыяльнай абароны, і сёння першая партыя нашай дапамогі ўжо трапіла на ўсходні фронт.
Збіралі спальнікі, паўэрбанкі, лекі і іншыя рэчы. Імкнемся падтрымаць і дапамагчы нашым украінскім братам.
Чытайце таксама:
У суботу, 29 студзеня, ля консульства Беларусі ў Беластоку правялі антываенную акцыю. Нагодай для яе стала сцягванне расійскіх войскаў на...
Чытаць далей
Акцыя салідарнасці з Украінай прайшла сёння вечарам у цэнтры Беластока. Жыхары горада, прадстаўнікі ўкраінскай і беларускай дыяспар сабраліся на Рынку...
Чытаць далей
Каля польска-беларускай мяжы з боку Тэрэспаля 2 сакавіка адбылася антываенная акцыя беларусаў. Яе арганізаваў кіраўнік Народнага антыкрызіснага ўпраўлення Павел Латушка....
Чытаць далей
