Акцыя салідарнасці з Украінай прайшла сёння вечарам у цэнтры Беластока. Жыхары горада, прадстаўнікі ўкраінскай і беларускай дыяспар сабраліся на Рынку Касцюшкі, каб выказаць падтрымку ўкраінскаму народу і выказаць пратэст супраць вайсковых захадаў расійскай дзяржавы ў дачыненні да Украіны.
Акцыю арганізавалі «Маладыя дэмакраты» з Беластока. У яе пачатку перад прысутнымі — а на акцыю прыйшлі каля паўсотні чалавек — выступіў кіраўнік беластоцкай суполкі арганізацыі Лукаш Таргоньскі:
— Пуцін атакуе вольны свет, і мы ўсе тут мусім паказаць салідарнасць з Украінай і яе жаўнерамі, паказаць, што краіны Захаду супрацьстаяць захадам Пуціна і яго імперыялістычным амбіцыям. Заходнія дзяржавы мусяць увесці як мага больш адчувальныя санкцыі супраць Пуціна і Расіі.
Дэпутат польскага Сейму Роберт Тышкевіч расказаў падчас мітынгу, што ў мінулую сераду быў у Вярхоўнай Радзе ў Кіеве разам з дэлегацыяй Польскага Сейму, каб выказаць украінскім сябрам салідарнасць і падтрымку.
«Беларусь таксама сёння пад расійскай акупацыяй. Болей за 30 000 расійскіх жаўнераў застаюцца ў Беларусі і не вяртаюцца дахаты. Мусім памятаць пра нашых сяброў-беларусаў, у якіх Пуцін таксама хоча забраць незалежнасць».
— Там убачыў, як для ўкраінцаў важна ў гэтую хвіліну — адчуваць, што яны не адны. Вельмі важна, каб не толькі палітыкі, але і грамадзяне, жыхары нашых гарадоў выказвалі салідарнасць і падтрымку нашым суседзям. Калі мы сёння баімся за нашу будучыню, то ўявіце, што адчуваюць жыхары Харкава, Львова, Кіева, як моцна ім патрэбна наша падтрымка. Толькі танкі, самалёты, вайсковая сіла — такі свет хоча зладзіць для ўсіх нас Пуцін. І сёння супраць арганізацыі такога шалёнага свету дыктатара з Масквы стаяць адважныя ўкраінцы. Але на гэтым шляху стаіць таксама салідарнасць Захаду, таму так важна, каб увесь гэты час мы былі салідарныя, каб санкцыі, накладзеныя на Расію, былі вельмі моцныя. Бо толькі яны ў стане спыніць марш Пуціна на захад, да нашых дзвярэй, — заявіў дэпутат.
Таксама Роберт Тышкевіч падзякаваў беларускай дыяспары, прадстаўнікі якой узялі ўдзел у акцыі, за тое, што сёння беларусы салідарныя з Украінай:
— Беларусь таксама сёння пад расійскай акупацыяй. Болей за 30 000 расійскіх жаўнераў застаюцца ў Беларусі і не вяртаюцца дахаты. Мусім памятаць пра нашых сяброў-беларусаў, у якіх Пуцін таксама хоча забраць незалежнасць.
Намеснік прэзідэнта Беластока Збігнеў Нікітаровіч на акцыі зазначыў, што Беласток — мультыкультурны горад, вельмі блізкі да Усходу.
«Гісторыя паўтараецца: у 30-х гадах мінулага стагоддзя Гітлер прыйшоў да ўлады пры падтрымцы свайго грамадства, Пуціна сёння таксама падтрымлівае расійскае грамадства. Але маем надзею, што так, як распалася савецкая імперыя, у хуткім часе сыдзе Пуцін, міне і тая імперыя, што ён спрабуе адбудаваць».
— Там, на Усходзе, адраджаецца імперыя зла, на чале якой стаіць Уладзімір Пуцін. Гэта імперыя пагражае Беларусі, выцягвае рукі да незалежнай Украіны. Наступнымі могуць быць такія краіны, як Літва, Латвія, Эстонія, і хто ведае, калі спыніцца расійскі імперыялізм. Сённяшняя Расія працятая нацыяналізмам і імперыялізмам. Гісторыя паўтараецца: у 30-х гадах мінулага стагоддзя Гітлер прыйшоў да ўлады пры падтрымцы свайго грамадства, Пуціна сёння таксама падтрымлівае расійскае грамадства. Але маем надзею, што так, як распалася савецкая імперыя, у хуткім часе сыдзе Пуцін, міне і тая імперыя, што ён спрабуе адбудаваць. Расія пакіне ў спакоі Беларусь, Украіну, і дачакаемся мы нармальнай, а не імперыялістычнай Расіі, поўнай нянавісці да меншых і слабейшых народаў, — заявіў Збігнеў Нікітаровіч.
На акцыі выступіў святар Украінскай грэка-каталіцкай царквы ў Беластоку айцец Андрэй. Святар казаў пра ўкраінцаў, якія з’ехалі з радзімы і выбралі Беласток месцам для жыцця, бо прыйшлося ўцячы, як часта бывае перад вайной. Ён распавёў, што некалькі год служыў у Расіі і ведае, чым жыве гэтая краіна. Расійскую дзяржаву ён параўнаў з мужчынам-агрэсарам, які хоча прысвоіць Украіну:
— Украіна нейкі час ішла ў абдымкі гэтага закаханага маньяка, але калі зразумела, што той крыўдзіць яе, і заявіла, што больш не хоча быць з ім, — той адказаў: не хочаш быць маёй — не будзеш нічыёй. Калі мужчына здзекуецца з жанчыны, мы ізалюем такога ад яе. Расія баіцца Украіны, бо тая ёсць сведкам таго, што столькі стагоддзяў Расія рабіла з Украінай, і хоча пазбавіцца гэтага сведкі. Таму давайце будзем сведчыць усяму свету, што Расія зараз робіць з Украінай. Сёння мы тут, у цэнтры Беластока, гаворым пра Пуціна — ён гэтага дабіваўся. Зло часам перамагае, але апошняе слова будзе за Богам.
Выступіў перад мітынгоўцамі і прадстаўнік беларускай дыяспары Ян Абадоўскі:
«У гэты цяжкі час мы хочам паказаць, што мы разам з народам Украіны, што мы выступаем супраць Пуціна і Лукашэнкі».
— Сёння беларусы таксама хочуць выказаць падтрымку ўкраінцам. Мы хочам паказаць сваю салідарнасць, прадэманстраваць, што мы разам. Мы пратэстуем таксама супраць расійскіх войскаў, якія знаходзяцца зараз на тэрыторыі Беларусі. Мы вельмі блізка да мяжы, а за той мяжой — войска, якое можа атакаваць Украіну, можа атакаваць Польшчу, краіны Балтыі. Мы хочам паказаць, што беларусы не хочуць ваяваць з аніводнай суседскай краінай, што мы хочам незалежнай айчыны, каб Беларусь была вольнай, каб тысяча палітычных вязняў выйшла з-за кратаў. І ў гэты цяжкі час мы хочам паказаць, што мы разам з народам Украіны, што мы выступаем супраць Пуціна і Лукашэнкі.
Падчас акцыі беларускі мастак-акцыяніст, анархіст Уладзіслаў Бохан зладзіў перформанс — выйшаў у хакейнай масцы з залепленымі вачыма і ротам і надпісам «Appeasement, Łagodzenie, Умиротворение», высыпаў на чорную плёнку кавалкі мяса, паклаў на яго ваенны білет і ў жэсце маўчання трымаў палец ля вуснаў. Як патлумачыў MOST аўтар перформансу, ён мусіў падштурхнуць да асэнсавання: абяцанні Аляксандра Лукашэнкі і беларускіх уладаў што да міру — марныя, а заклапочанасці і занепакоенасці як рэакцыі на злачынствы рэжымаў — недастаткова ў існых умовах.
