Ад 15 сакавіка пачынаецца прыём заявак на стыпендыяльную праграму імя Кастуся Каліноўскага для студэнтаў, рэпрэсаваных па палітычных матывах у Беларусі. Дакументы будуць прымацца да 15 мая, расказалі MOST у Беларускім моладзевым хабе.
Набор абвешчаны як на праграму першай ступені вышэйшай адукацыі (анкету для падачы заяўкі можна ўзяць тут), так і на навуковыя стажыроўкі (анкету можна ўзяць тут).
Студэнты, якія пройдуць адбор на праграму, змогуць навучацца ў розных вышэйшых навучальных установах па ўсёй Польшчы. Стыпендыя разлічана на пяць гадоў і складае 1250 злотых у месяц для студэнтаў бакалаўрыяту і 1500 злотых — для навучэнцаў магістратуры.
У першую чаргу на праграму ідзе набор адлічаных і рэпрэсаваных студэнтаў з Беларусі. Таксама могуць спрабаваць падавацца і тыя, хто пазбаўлены магчымасці навучацца ў Беларусі.
Больш падрабязна пра стыпендыяльную праграму імя Кастуся Каліноўскага чытайце тут.
