Арганізатары калядных кірмашоў у Шчэціне і Торуні закрылі кіёскі Свята-Елісавецінскага манастыра з Мінска, які падтрымлівае расійскіх вайскоўцаў. Гэта адбылося пасля ўмяшання беларускіх актывістаў і вернікаў.
Прадстаўнікі арганізатара кірмашу ў Шчэціне заявілі журналістам, што не ведалі пра прарасійскую дзейнасць манастыра, пакуль на яе не звярнулі ўвагу беларускія актывісты і медыя. Актывісты 1 снежня правялі пікет каля кіёска манастыра.
«Не будзем больш супрацоўнічаць з гэтым суб’ектам, пастанова прынятая. Выкрэсліваем гэтых сясцёр са спісу суб’ектаў, з якімі супрацоўнічаем (…). Гэта [дазвол манастыру гандляваць на кірмашы] не наш дрэнны намер, а няведанне», — цытуе партал Interia.pl прэс-сакратара арганізацыі Цаліну Волаш.
Прадстаўнікоў Свята-Елісавецінскага манастыра абавязалі пакінуць кіёск у Шчэціне да 12 гадзін 3 снежня.
Таксама кіёск манастыра быў зачынены на калядным кірмашы ў Торуні. Як паведамляе тэлеграм-канал «Хрысціянская Візія», на недапушчальнасць яго дзейнасці звярнулі ўвагу беларускія і ўкраінскія грэка-каталікі.
Свята-Елісавецінскі манастыр, які знаходзіцца ў мінскім раёне Навінкі, вядомы адкрытай падтрымкай расійскіх вайскоўцаў ва Украіне. У манастыры збіраюць дапамогу для расійскай арміі. Духоўнік манастыра айцец Андрэй Лемяшонак выступаў у падтрымку Лукашэнкі і Пуціна і крытыкаваў «бездухоўны Захад». Гэта не перашкаджае манастыру рэгулярна наведваць кірмашы ў розных краінах Еўропы і гандляваць там сувенірамі і рэлігійнай атрыбутыкай. У верасні 2024 года, напрыклад, яго заўважылі на фестывалі трох культур у польскай Уладаве.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
