На сцяне дома №4 па вуліцы Кірава ў Гродне ўсталявалі шыльду ў гонар трэнера Рэнальда Кныша, які выхаваў алімпійскую чэмпіёнку Вольгу Корбут. У гэтым доме ў цэнтры горада Кныш жыў з 1944 па 1971 гады.
За час сваёй працы Рэнальд Кныш вынайшаў каля 30 новых элементаў у спартыўнай гімнастыцы, за што быў уганараваны званнем «Заслужаны трэнер СССР» у 1964 годзе.
З 1953 года Кныш працаваў трэнерам у Гродзенскай дзіцячай спартыўнай школе №3 у секцыі спартыўнай гімнастыкі. Быў трэнерам алімпійскіх чэмпіёнак Алены Валчэцкай і Вольгі Корбут, а таксама чэмпіёнкі СССР Тамары Аляксеевай. Заслужаны трэнер у 1972 годзе стаў ганаровым грамадзянінам Гродна, а ў 1974 годзе атрымаў званне «Заслужаны дзеяч фізічнай культуры БССР».
У 2018 годзе Корбут заявіла ў ток-шоу на расійскім тэлебачанні, што калі ёй было 17, Кныш яе згвалціў. Той абвяргаў усе абвінавачванні.
Рэнальд Кныш памёр у 2019 годзе, яму было 88 год.
Шыльда на доме па вуліцы Кірава зроблена Уладзімірам Панцялеевым — скульптарам, ганаровым грамадзянінам Гродна.
