Вока беларуса абавязкова заўважыць у гарадской прасторы Беластока шматлікія выявы Пагоні — бо вершнік на кані з’яўляецца элементам гербаў Падляскага ваяводства і горада Беластока. Расказваем гісторыю.
Падляскае ваяводства стварыў у 1513 годзе вялікі князь Жыгімонт І. Да 1569 года яно належала да Вялікага Княства Літоўскага, але разам з прыняццем Люблінскай Уніі сойм са згоды дэпутатаў з Падляшша далучыў ваяводства да Кароны Польскай. Тое ваяводства мела зусім іншыя межы — усходняя мяжа падляскага ваяводства, а разам з ім і Кароны Польскай, праходзіла па Беластоку. Палац Браніцкіх і Рынак належалі яшчэ да Кароны Польскай, а за кіламетр на ўсход, за цяперашняй вуліцай Скарупскай, пачыналася Вялікае Княства Літоўскае.
Пра «вялікалітоўскае» мінулае Падляскага ваяводства цягам усяго існавання Рэчы Паспалітай нагадваў герб Падляскага ваяводства — выявы Пагоні і Белага Арла (герба Польшчы), размешчаныя адна насупраць другой.
У 1807 годзе як Падляшша было перададзена ад Прусіі да Расійскай Імперыі — і была створаная Беластоцкая акруга. Імператар Аляксандр І зацвердзіў яе герб: Белы Арол і Пагоня, але на гэты раз размешчаныя не побач, а Арол быў над Пагоняй. Гэты геральдычны сюжэт застаўся надоўга. У 1842 годзе Беластоцкая акруга была скасаваная, але ў 1882 годзе герб з такім жа сюжэтам імператар Аляксандр ІІІ зацвердзіў як сімвал горада Беластока. Арол і Пагоня былі беластоцкім гербам і пад нямецкай акупацыяй часоў І Сусветнай вайны, і ў міжваеннай Польшчы, і ў часы Польскай Народнай Рэспублікі (толькі што з Арла ў той час прыбралі карону). Сучасная выява была зацверджаная ў 1995 годзе.
Герб Падляскага ваяводства, на якім выяўленыя Белы Арол і Пагоня, быў зацверджаны афіцыйна ў 2001 годзе. Ён мае свае адрозненні ад герба Беластока. На гербе ваяводства ўсё геральдычнае поле — чырвонае, у той час як на гербе горада верхняя частка, на якой Арол — чырвоная, а ніжняя, дзе Пагоня, — жоўтая.
