Брэсцкі сайт brestnote.by быў заблакаваны беларускім правайдарам па патрабаванні Раскамнагляду з-за асвятлення вайны Расіі з Украінай. Аб гэтым паведамляе Беларуская асацыяцыя журналістаў.
Рэдактарка сайту Наталля Грынчак распавяла, што 3 красавіка атрымала ліст ад інтэрнэт-правайдара, які абслугоўвае сайт, з патрабаваннем выдаліць артыкул з хронікай вайны Расіі з Украінай. У лісце паведамлялася, што Раскамнагляд унёс сайт у рэестр інтэрнэт-старонак, што змяшчаюць інфармацыю, распаўсюджванне якой забароне ў Расійскай Федэрацыі. Таксама вядома, што з такім патрабаваннем аб выдаленні артыкула звярнулася Генеральная пракуратура РФ.
Грынчак звярнулася да правайдара з запытам аб тым, як Раскамнагляд можа паўплываць на блакіроўку ў Беларусі беларускіх інтэрнэт-рэсурсаў.
— Адказ мяне здзівіў. Аказваецца, што Раскамнагляд, які з’яўляецца арганізацыяй, што рэгулюе парадак доступу да інфармацыйных рэсурсаў у сетцы Інтэрнэт з тэрыторыі Расійскай Федэрацыі, мае паўнамоцтвы загадваць інтэрнэт-правайдэрам блакаваць доступ да сайта як па імені дамену, так і па IP-адрасу — у тым ліку на тэрыторыі Беларусі, — распавяла рэдактарка.
Сайт brestnote.by прыбраў артыкул, які не спадабаўся Раскамнагляду, пасля чаго яго разблакавалі.
