Беларускае культурнае таварыства «Хатка» хоча ўсталяваць у Гданьску крыж у гонар змагароў за вольную і дэмакратычную Беларусь. Ён будзе ўшанаваннем памяці тых, хто не мае магілы. Арганізацыя пачала збор сродкаў на рэалізацыю праекта.
У «Хатцы» паведамілі, што такая ідэя ўзнікла яшчэ ў 2018 годзе падчас святкавання 100-годдзя Беларускай Народнай Рэспублікі. І растлумачылі, што шмат хто з дзеячаў дагэтуль не мае магілы, бо «загінуў недзе ў савецкай высылцы або быў расстраляны ў Курапатах ці ў засценках НКУС».
Арганізацыя нагадала, што пасля выбараў 2020 года з’явіліся новыя ахвяры рэжыму, а ва Украіне «беларусы працягваюць змагацца і паміраць за ідэалы свабоды і незалежнасці».
«Мы лічым сваім абавязкам стварыць у Гданьску сімвалічнае месца нацыянальнай памяці, каб ушанаваць герояў і захаваць пра іх памяць для будучых пакаленняў», — паведамілі ініцыятары.
Крыж з каменнымі табліцамі плануецца паставіць на Гарнізонных могілках у Гданьску. Праект падрыхтаваў архітэктар Станіслаў Шыманьскі, а яго выканаўцамі будуць каменячос Раман Лебрэхт і сталяр Ян Ассоўскі. Праца разам з матэрыяламі ацэньваецца ў 25 тыс. злотых. Усталяванне плануецца завяршыць да жніўня 2025 года.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
