Журналісту польскага выдання Gazeta Wyborcza і дзеячу польскай нацыянальнай меншасці ў Беларусі Анджэю Пачобуту спаўняецца 52 гады. Гэта ўжо пяты дзень нараджэння, які Пачобут сустракае ў зняволенні.
Польшча намагаецца вызвалення Пачобута, аказваючы ціск на рэжым Лукашэнкі. Гэта, напрыклад, адна з умоў адкрыцця памежнага пераходу «Баброўнікі», які быў закрыты на наступны дзень пасля выраку журналісту.
12 красавіка Лукашэнка пракаментаваў гэтыя намаганні так: «Пачобут гэты — вечная праблема. І нейкая яшчэ тэма. “Для таго каб размаўляць з намі, беларусы павінны зрабіць гэта”. Я кажу: “Ды пашліце вы іх”. Мы нікому нічога не павінны. Хочаце — сядаем размаўляем».
У студзені 2025 года Лукашэнка заяўляў, што Польшча нібыта «адмовілася ад Пачобута». У лютым міністр замежных спраў Польшчы Радослаў Сікорскі сказаў, што абмяркоўваў справу Пачобута з прадстаўнікамі ЗША падчас візіту ў Вашынгтон.
Анджэй Пачобут быў затрыманы 25 сакавіка 2021 года ў сваім доме ў Гродне пасля ператрусу. З таго часу ён застаецца ў турме. Беларуская пракуратура абвінаваціла журналіста ў распальванні нацыянальнай варожасці і закліку да дзеянняў, якія пагражаюць нацыянальнай бяспецы. 8 лютага 2023 года яму прысудзілі 8 гадоў калоніі. Паводле звестак праваабаронцаў, у пачатку 2025 года Пачобуту на паўгода працягнулі ўтрыманне ў памяшканні камернага тыпу, дзе ўмовы яшчэ больш суровыя.
Беларусы і палякі, якія жывуць у Беластоку, штомесяц збіраюцца на акцыі салідарнасці ў цэнтры горада, каб нагадаць пра зняволенага журналіста. У сакавіку 2025 года ўдзел у акцыі прынялі ваявода Падляскага ваяводства Яцэк Бжазоўскі, прэзідэнт Беластока Тадэвуш Трускаляскі і маршал Сената Малгажата Кідава-Блоньска.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
