Грамадзянам Літвы і Латвіі дазволілі бязвізавы ўезд у Беларусь. Ён будзе дзейнічаць ад 15 красавіка і толькі месяц. Аб гэтым паведаміў Дзяржаўны памежны камітэт.
Ад 15 красавіка латышы і літоўцы змогуць без віз трапіць у Беларусь. Урад Аляксандра Лукашэнкі робіць гэта з некалькіх прычын: з-за таго, што праз каронавірусныя абмежаванні грамадзяне Латвіі і Літвы не мелі магчымасці наведаць сваякоў у Беларусі, з-за набліжэння праваслаўных і каталіцкіх святаў.
Грамадзяне Літвы і Латвіі змогуць перасекчы мяжу ў пунктах пропуску на беларуска-латвійскім і беларуска-літоўскім участках мяжы. Такі рэжым будзе дзейнічаць ад 00:00 гадзін 15 красавіка да 15 мая ўключна. Перасякаць мяжу можна будзе неабмежаваную колькасць разоў і знаходзіцца на ўсёй тэрыторыі Беларусі.
Для ўезду ў Беларусь замежнікам спатрэбіцца прад’явіць дзейныя дакументы для выезду за мяжу, зялёную картку (калі чалавек будзе ехаць на аўто), адмоўны ПЦР-тэст альбо сертыфікат аб вакцынацыі, а таксама мець пры сабе медыцынскую страхоўку.
