У Беластоку адкрылі вулічную выставу Uwięzieni za polskość («Зняволеныя за польскасць»), прысвечаную Саюзу Палякаў на Беларусі. Раней выстава экспанавалася ў Сейме Польшчы. Акцэнт зроблены на асобах Анжалікі Борыс і Анджэя Пачобута.
Дата, калі выстава з’явілася каля помніка ксяндзу Папялушку ў цэнтры Беластока, невыпадковая. 2 мая адзначаецца «Дзень Палоніі», фактычна — дзень палякаў за мяжой. У гэты ж дзень адзначаецца Дзень польскага сцяга.
На адкрыцці прысутнічалі прэзідэнт гораду Тадэвуш Трускаляскі, ваявода Багдан Пашкоўскі, старшыня суполкі СПБ у Ваўкавыску Марына Цішкоўская, старшыня падляскага аддзялення Таварыства Польскай Супольнасці Анна Кетлінска ды іншыя.
— Нашых суайчыннікаў за мяжой пераследуюць толькі за тое, што яны — палякі, — адзначыў прэзідэнт Беластока. Паводле спадара Трускаляскага, найлепшыя прыклады гэтага — лёсы Анжалікі Борыс, якую нядаўна перавялі пад хатні арышт, і Анджэя Пачобута, які ўжо 13 месяцаў за кратамі.
— Гэтая сціплая выстава, — працягнуў спадар Трускаляскі, — доказ нашай памяці і салідарнасці з тымі, хто пакутуе за польскасць. Калі ў нейкай дзяржаве няма дэмакратыі, то рана ці позна яна стане дэспатыяй. А нават — дзяржавай пад кіраўніцтвам тырана. Найлепшы прыклад акурат за нашай усходняй мяжой: за бліжэйшай і за далейшай. На шчасце, у Польшчы няма палітычных вязняў, але, на жаль, гэта не значыць, што палякі не пакутуюць.
Фота з выставы прэзентуюць як радасныя, так і сумныя старонкі жыцця СПБ: ад святкавання Казюкаў да суду над Анжалікай Борыс. Сярод іншага, прагучала, што кейс СПБ унікальны, бо ў Беларусі з 2005 года працуюць дзве арганізацыі з такой назвай: легальная і нелегальная. Адну падтрымліваюць афіцыйныя ўлады, іншую — улады Польшчы і палякі.
