Іван родам з Ваўкавыска, дзе працуе адзін з самых вядомых беларускіх вытворцаў пельменяў. Не дзіва, што да гэтага прадукту ў яго асаблівыя пачуцці. Эміграваўшы ў Польшчу, ён спачатку ляпіў пельмені самастойна і прадаваў праз Facebook, потым адкрыў рэстаран пельменяў, а затым змяніў фармат — цяпер разам з любімай жанчынай Марыяй ён смажыць пельмені ў цэнтры Варшавы і частуе турыстаў з пяці кантынентаў. Пра свой бізнес яны расказалі праекту MOST «Беларусы могуць».
Іван і Марыя пазнаёміліся выпадкова. Жанчына з’ехала спачатку ва Украіну, а калі пачалася вайна, прыехала ў Польшчу. Трэба было дзесьці спыніцца, і Іван адгукнуўся на прапанову часова прытуліць незнаёмку. З тых часоў яны разам. І бізнес свой назвалі адпаведна — Jedna Miłość, ці па-беларуску «Адно каханне».
У Беларусі Іван не быў звязаны з гастраноміяй. Займаўся продажам электратавараў у сегменце B2B. Марыя была менеджарам і прадаўцом матэрыялаў для дахаў і платоў. Але ў Польшчы яны ўвайшлі ў новую для сябе галіну.
Спачатку Іван ляпіў пельмені на сваёй кухні і прадаваў праз Facebook. Паступова попыт павялічваўся. Іван кажа, што ў яго пельмені «лепшыя за ваўкавыскія», бо робяцца ўручную і з любоўю.
Удваіх беларусы адкрылі на ўскрайку Варшавы рэстаран пельменяў на 50 месцаў. Прапрацавалі год і зразумелі, што фармат няўдалы: праходнасць месца невялікая.
Тады яны перафарматавалі бізнес і адкрылі ў цэнтры невялікі павільён на 22 кв. метры. Побач два буйныя гатэлі — турыстаў шмат, праходнасць месца ў дзесяць разоў вышэйшая, а Jedna Miłość адразу кідаецца ў вочы.
Але на такой маленькай плошчы абсталяваць паўнавартасную кухню немагчыма. Таму па аўтарскіх рэцэптах Івана пельмені лепяць у іншым месцы, замарожваюць і прывозяць у павільён. Тут іх смажаць і вараць. У меню — не толькі пельмені, але й чабурэкі, зразы, варэнікі, а таксама супы і салаты. Ёсць, напрыклад, селядзец пад футрам, па якім у эміграцыі сумуюць беларусы, якія не гатуюць самастойна.
— А немцы проста кайфуюць ад нашага баршчу з ялавічынай, — сцвярджае Марыя. І дадае, што цяпер іх ежай частуюцца турысты з пяці кантынентаў.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
