Лідар гурта Sumarok і журналіст MOST Ігар Палынскі выпусціў песню на верш паэткі Анхелы Эспіносы Руіс. Мы пагутарылі з Ігарам пра рэліз, як ствараўся сінгл і чаму пакуль не трэба чакаць альбому.
Пра што песня
— Гэта песня-настрой, песня-атмасфера, — падкрэслівае Ігар. — Важны момант: тое, што закладала аўтарка вершу, паэтка Анхела Эспіноса Руіс, — гэта цалкам можа адрознівацца ад таго, што ў ім адчуў я, калі ўпершыню заспяваў. А выбар аказаўся вельмі інтуітыўным.
У гурта Sumarok, лідарам якога з’яўляецца Ігар Палынскі, ёсць ужо чатыры песні на вершы Анхелы. Першую песню, пад назвай «Зоркі былі супраць нас», запісалі ў 2018 годзе. У 2022 годзе з’явіліся яшчэ тры. «Што засталося» — адна з іх.
Упершыню на публіцы новыя песні прагучалі на «Мове Нанова» ў Беластоку 5 мая. Госцяй імпрэзы была якраз Анхела, а Ігар выступіў музычным госцем.
— Тыя, хто чуў песню жыўцом тады, ацанілі. На рэліз толькі пачынаю збіраць фідбэк. А мне асабіста вельмі падабаецца, што атрымалася.
Стварэнне «Што засталося»
Запіс песні адбыўся ў студыі «МедыяПорту» ў Беластоку. Там месціцца і рэдакцыі MOST.
— «Што засталося» — гэта адна з маіх любімых песень проста зараз. Днямі атрымаўся вельмі адпаведны настрой, каб яе запісаць.
Здымак для вокладкі песні зрабіў журналіст Алесь Кіркевіч. З гукам дапамагаў сябар Ігара Алесь Купцэвіч: «Мы пачалі працаваць з Алесем з музычнай гісторыяй яшчэ ў 2016 годзе, калі быў запісаны мой канцэртнік у Мінску», — адзначае Ігар.
Акрамя гітары, у песні можна пачуць клавішныя. Іх партыі запісвалі на даволі рэдкім інструменце — нямецкім электрааргане Hohner 1985 года.
Чаму толькі сінгл, а не альбом
Ігар расказвае, што песень назбіралася дастаткова, ёсць думка пра запіс альбому. Аднак ён кажа, што не можа доўга хаваць ад публікі напісаныя песні.
— Ёсць пэўнае занепакаенне, што альбом можа стаць такой сабе кампіляцыяй проста песень апошняга часу. А хацелася б вытрымаць пэўную канцэпцыю.
Амаль усе музыканты, з якімі Ігар ствараў музыку, раскіданыя па свеце. Цяпер ён шукае музыкантаў у Беластоку, якім, як кажа лідар гурта Sumarok, заходзіў бы мэсадж яго песень.
— Шукаю музыкантаў, якія б захацелі дапамагчы мне ўпакаваць гэта ўсё ў аранжыроўкі і, магчыма, пракаціцца па Польшчы з канцэртамі. А пакуль жа на канцэртах — акустыка як яна ёсць.
