У польскіх гарадах 9 жніўня прайшлі акцыі, прымеркаваныя да шостай гадавіны беларускіх пратэстаў 2020 года супраць сфальсіфікаваных прэзідэнцкіх выбараў і гвалту з боку рэжыму Лукашэнкі.
У Варшаве мерапрыемства адбылося ў цэнтры горада, каля помніка Мікалаю Каперніку. Да акцыі далучыліся прадстаўнікі беларускай дыяспары, былыя палітвязні, актывісты і блогеры.
Перад удзельнікамі са сцэны выступіла лідарка дэмакратычных сіл Святлана Ціханоўская. Яна нагадала пра падзеі 2020 года, калі масавыя пратэсты ў Беларусі сталі нечаканасцю і для ўладаў, і для экспертаў.
«Рэжым ламаў галаву: хто выводзіць людзей? Хто ўсё гэта арганізаваў? А адказ быў вельмі просты: беларусы самі.
Нас з вамі хавалі ўжо не адзін раз. Казалі: яшчэ пару месяцаў і ўсё. Перасварацца, раз’едуцца, забудуцца. Але вось ужо шэсць гадоў, і беларускі рух жыве. Мы жывём! Прыходзяць новыя людзі, з’яўляюцца новыя ідэі, выходзяць палітвязні», — сказала Ціханоўская.
Яна заклікала беларусаў не забываць пра падзеі 2020 года.
«Таму, калі ў некага цяпер апускаюцца рукі, згадайце пра дваццаты. Беларускае, жывое, свабоднае ўсё роўна прарасце, як бы яго ні спрабавалі задушыць. Мы проста павінны рабіць сваю справу і рыхтавацца да новага акна магчымасцяў», — сказала яна.
Пасля пікета ўдзельнікі сфарміравалі калону і прайшлі маршам па цэнтры Варшавы.
Вечарам самая пазнавальнае месца Варшавы — Палац культуры і навукі — з нагоды 9 жніўня асвятлілі ў бел-чырвона-белых колерах.
Акцыі беларусаў 9 жніўня прайшлі і ў іншых буйных гарадах Польшчы:
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
