У гродзенцаў, якія жывуць у эміграцыі, з’явілася традыцыя: кожны год 3 лістапада збірацца разам і адзначаць Дзень святога Губерта, які лічыцца неафіцыйным Днём Гродна. Сёлета сустрэча ў Беластоку прайшла ўжо ў чацвёрты раз.
Свята арганізавалі ў Цэнтры Заменгофа ў Беластоку. Адным з галоўных арганізатараў мерапрыемства выступіла рэдакцыя гродзенскага партала Hrodna.life.
Пачалі з відэа сучаснага Гродна, якое знялі за некалькі тыдняў да сустрэчы. Удзельнікі пазнавалі знаёмыя вуліцы і абмяркоўвалі, як змяніўся горад за апошнія гады. Пасля гулялі ў гродзенскае бінга і ўдзельнічалі ў віктарыне. Трэба было, напрыклад, успомніць, калі на гродзенскім піўзаводзе зварылі апошняе піва, і адгадаць колькасць прыступак на Лесвіцы кахання каля Старога замка.
Да свята далучыліся і гродзенцы, якія цяпер жывуць у іншых польскіх гарадах. Землякі з Уроцлава, Вільні і Чыкага даслалі відэавіншаванні.
На сустрэчы таксама падвялі вынікі віртуальнага забегу «След святога Губерта», у якім удзельнічалі 40 чалавек з васьмі краін. Гродзенскі фатограф Максім Швед паказаў здымкі роднага горада 2006–2010 гадоў, а музыкант Алесь Дзянісаў выступіў з акустычным канцэртам.
У наступным годзе Гродна адзначыць 900-годдзе. Адзін з арганізатараў сустрэчы, галоўны рэдактар Hrodna.life Аляксей Шота, анансаваў з гэтай нагоды больш маштабнае святкаванне ў Беластоку.
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
