На выданне кнігі пра Плошчу Перамен збіраюць грошы, сабрана 40% ад неабходнай сумы — і гэта толькі за два дні.
6 ліпеня на краўдфандынгавай платформе Kickstarter пачаўся збор грошаў на выданне фотакнігі пра дваравую супольнасць Плошчы Перамен. Аўтар ідэі праекта — фотажурналіст і жыхар знакамітага мінскага двара Яўген Аццецкі.
Кніга пра Плошчу Перамен — гэта храналогія першых трох месяцаў барацьбы адной з самых знакамітых у Беларусі дваравых супольнасцей, якая сфарміравалася на хвалі пратэстаў 2020 года. Гэта гісторыя людзей, якія вырашылі выступіць супраць несправядлівасці: сфальсіфікаваных прэзідэнцкіх выбараў і вялікага ўзроўню гвалту з боку міліцыі.
У кнізе ёсць 70 рэпартажных і партрэтных фотаздымкаў Яўгена Аццецкага і 13 гісторый ад жыхароў Плошчы Перамен. Кніга прысвечаная Раману Бандарэнку, жыхару Плошчы Перамен, якога скралі невядомыя 11 лістапада 2020 года са свайго двара. 12 лістапада беларусы даведаліся пра яго смерць.
Праца над кнігай вялася міжнароднай камандай з Беларусі, Швейцарыі і Украіны.
Збор на платформе Kickstarter пройдзе да 16 жніўня 2022 года. Прэзентацыя кнігі адбудзецца ў Варшаве (18 жніўня) і Вільні (23 жніўня).
