15 тысяч — менавіта столькі палітычных уцекачоў з Беларусі прыняла Польшча пасля жніўня 2020 года. Пра гэта, а таксама пра мігрантаў на мяжы з Еўрасаюзам казаў на міжнароднай канфэрэнцыі аб ахове межаў ЕС у Вільні кіраўнік польскага МУС Марыюш Каміньскі.
Міністр адзначыў, што Польшча з часу выбараў у Беларусі ў жніўні 2020 года прыняла амаль 15 тысяч беларусаў, якія вымушаныя былі ўцякаць са сваёй краіны ад пераследу.
Ён таксама пракаментаваў міграцыйны крызіс, які выбухнуў у 2021 годзе на мяжы Беларусі з краінамі ЕС. Паводле слоў Камінскага, ён быў справакаваны, каб «помсціць Польшчы, Літве і Латвіі за падтрымку, якая была прадастаўлена беларускай апазіцыі» і каб пачаць перамовы з ЕС для адмены санкцый.
— Дыктатар хацеў дэстабілізаваць сітуацыю ў нашых краінах, але насамрэч яго мэты ішлі далей. Ён павінен быў успомніць 2015 год і дзясяткі тысяч мігрантаў, а не ўцекачоў, якія штурмавалі нашы межы, гэта павінна было быць пачаткам. Калі б яны прайшлі, мы б мелі справу з сотнямі тысяч. Яго мэта была зразумелая: ён хацеў міжнароднага прызнання свайго незаконнага прэзідэнцтва, хацеў пачаць перамовы з Еўрасаюзам і хацеў, каб знялі санкцыі, — сказаў Каміньскі.
Праз Польшчу ў Германію
У 2021 годзе польскія памежнікі зафіксавалі амаль 40 тысяч спроб незаконнага перасячэння мяжы з боку Беларусі. З 1 снежня па 1 сакавіка 2022 года ў Польшчы абмежавана знаходжанне паблізу мяжы з Беларуссю. Забарона ахоплівае 115 гарадоў Падляшскага ваяводства і 68 гарадоў Любельскага ваяводства.
За 2021 год у Германію праз тэрыторыю Беларусі і Польшчы прыбылі 11 213 нелегальных мігрантаў, да канца года іх колькасць стала зніжацца. Аб гэтым паведаміла федэральная паліцыя ФРГ. Колькасць мігрантаў пачаў расці летам. У жніўні ў Германію ўехалі 474 нелегальныя мігранты, пасля чаго іх колькасць рэзка ўзрасла — да 2 049 чалавек у верасні. У кастрычніку паток мігрантаў вырас да 5 294 чалавек, да лістапада ён знізіўся да 2 849, у снежні зафіксавалі ўезд 521 нелегальнага мігранта.
