Кнігу Уладзіміра Някляева «Гэй Бэн Гіном» цяпер можна набыць у Беластоку або з дастаўкай па ўсім свеце. Пра гэта MOST расказаў кіраўнік фонду Kamunikat.org, які выступіў у якасці выдаўца кнігі, Яраслаў Іванюк.
«Гэй Бэн Гіном» — раман легендарнага беларускага пісьменніка, кандыдата ў прэзідэнты Беларусі-2010 Уладзіміра Някляева. У перакладзе назва абазначае «геена вогненная» або «пекла». Над кнігай Някляеў працаваў цягам апошніх год, з прычыны палітычнай сітуацыі ў Беларусі яе выхад на радзіме аўтара стаўся немагчымым. Таму кнігу выдалі ў Беластоку, а прэзентавалі ў шэрагу гарадоў Польшчы, а таксама Вільні.
— Першы наклад кнігі быў распрададзены падчас прэзентацыйнага туру, таму зрабілі дадатковы наклад — гэта не перавыданне. Калі будзе запатрабаванасць, будзем дадрукоўваць яшчэ, — расказаў Яраслаў Іванюк.
Кнігу можна набыць у Беластоку на сядзібе фонду Kamunikat.org (Proletariacka 11), папярэдне ўзгадніўшы візіт. Таксама магчымая дастаўка па Польшчы, у Беларусь і агулам па ўсім свеце. Кошт асобніка — 50 злотых плюс дастаўка. Па ўсіх пытаннях можна звяртацца ў тэлеграм https://t.me/FundacjaKamunikat або па e-mail [email protected].
