Апошнія дні караля Баторыя апісаныя ў новым буклеце ад выдавецтва «ЛітАРы». Ён выйшаў з друку ў студзені 2022 у Гродне. Пра гэта паведамляе Hrodna.life са спасылкай на тэлеграм-канал «11:27».
Укладальнікі буклета — гродзенскія гісторыкі Аляксандр Хацько і Васіль Герасімчык. Усю працу яны выканалі яшчэ ў лістападзе 2021 і планавалі выдаць буклет да дня смерці Баторыя 12 снежня. Але з-за занятасці не паспелі.
Памер выдання невялікі — усяго 16 старонак з ілюстрацыямі. У ім змешчаны перакладзены на беларускую мову і адаптаваны для сучаснага чытача тэкст, аўтарам якога быў, верагодна, лекар Якуб Гаслаўскі. Лекар быў у атачэнні манарха і пасля смерці караля апісаў яго апошнія дні, сімптомы, ход хваробы і ўскрыццё цела.
Калі буклет будзе карыстацца попытам, то ўкладальнікі плануюць зрабіць серыю такіх выданняў пра ўсіх манархаў, звязаных з Гроднам. Таксама ў больш далёкіх планах гісторыкаў – кніга пра жыццё караля Баторыя ў Гродне.
Як выглядаў Стэфан Баторый у 1930-м годзе
У снежні 1586 года Баторый раптоўна памёр ад урэміі (ускрыццё яго цела лічыцца першым такім медыцынскім актам, задакументаваным на тэрыторыі Усходняй Еўропы). У Гродне ён быў першапачаткова і пахаваны ў падвалах Фары Вітаўта. Праз паўтара года яго цела перавезлі ў Кракаў і пахавалі на Вавелі.
Эксгумацыя парэшткаў манарха прайшла ў 1930 годзе. Захаваліся нават здымкі з адкрыцця саркафага манарха.
Кароль Баторый і Гродна
У Гродна Стэфан Баторый упершуню прыехаў у 1579 годзе. Горад яму так спадабаўся, што ён жыў і адпачываў менавіта тут, дзе і памёр ва ўзросце 53 гадоў. Каралём Польшчы і вялікім князем літоўскім ён быў на працягу 10 гадоў (1576 — 1586 гады).
Стэфан Баторый, безумоўна, — адна з найважнейшых асоб у гісторыі Гродна. Пры ім і пасля яго пачаўся «залаты век» Гродна (першая палова XVII стагоддзя). Па яго распараджэнню пачалося ўзвядзенне ў рэнесансным стылі мураванай Фары Вітаўта. Кароль перабудаваў замак, з яго дазволу ў Гродне з’явілася мураваная сінагога. Гэты легендарны чалавек уваходзіць у тройку самых знакамітых гродзенцаў.
