Сёння каля беларускага консульства ў Беластоку сабраліся ў падтрымку ўкраінскага народа. Напачатку акцыі ўключылі гімн Украіны.
«Мы не ведаем, што ў галовах гэтых дыктатараў»
Арганізатар акцыі Ян Абадоўскі заявіў, што палякі, украінцы і беларусы сабраліся на маніфестацыі, каб паказаць, што пратэстуюць супраць вайны:
— Сёння мы тут сабраліся, каб паказаць нашу салідарнасць з украінскім народам. Мы — беларусы, з нашай тэрыторыі сёння заехалі танкі, але мы пратэстуем супраць умяшальніцтва Крамля, дыктатара Лукашэнкі, дыктатара Пуціна супраць вольнай Украіны. Сёння мы тут сабраліся, каб пратэставаць супраць танкаў. Паглядзіце, ужо гінуць людзі, мы ў 50 кіламетрах ад мяжы з Беларуссю. Мы не ведаем, што ў галовах гэтых дыктатараў, можа, наступнымі будзем мы, можа, атакуюць Беласток? Няможна ўжо размаўляць з імі, трэба дзейнічаць, трэба дзейнічаць жорстка. Сёння ва Украіне гінуць людзі! Тое, што сёння зрабіў Лукашэнка, — гэта апошні цвік у яго труну!
«Ведаю, што Украіна гэта вытрымае і зробіцца яшчэ мацнейшай»
Прадстаўніца беларускай дыяспары ў Беластоку Кацярына Дзерман сказала:
— Сённяшні дзень — гэта адзін суцэльны боль. Не змяшчаецца ў галаве, што такое магло адбыцца, мы да апошняга не верылі. На жаль, сёння — вайна. Гэта вайна, якую Расія развязала супраць Украіны. Няхай яны называюць гэта нейкай «ваеннай аперацыяй», але гэта смешна. Гэта — вайна, яны — акупанты. Можа, скажу непапулярную рэч, але мне не шкада расійскіх салдат. Яны прыйшлі ў чужую хату і там забіваюць людзей. Бачу, як мужна змагаюцца ўкраінцы, запісваюцца ў атрады самаабароны, здаюць кроў. Я ведаю, што Украіна гэта вытрымае і зробіцца яшчэ мацнейшай. Што будзе з Расіяй — гэта вялікае пытанне. Сёння хтосьці выйшаў на вуліцы Расіі з пратэстам, але гэтага вельмі мала, Расія спіць глыбокім сном.
«Звар’яцелы нацыст забіваў пераважна чужыя народы — гэтыя забіваюць і свой, і чужы»
Сяргей Верамеенка з Гродна падзяліўся:
— Мы мусілі пакінуць нашу родную Гародню, нашу Беларусь, таму што туды прыйшла акупацыя. Гэтыя танкі, якія цяпер едуць з боку Беларусі, гэтыя жаўнеры не выйшлі ў 2020 годзе бараніць свой народ ад узурпатара. Вы думаеце, яны зараз будуць на баку ўкраінскага народа? Часам Пуціна і Лукашэнку параўноўваюць з Гітлерам. Але звар’яцелы нацыст забіваў пераважна чужыя народы — гэтыя забіваюць і свой, і чужы, яны горшыя.
«Пакажыце, што такое — сіла народа!»
Удзельнік акцыі, украінец Антон прамовіў:
— Звяртаюся да народаў Расіі і Беларусі, якія знаходзяцца ў сваіх краінах. Вашы рэжымы разумеюць толькі мову сілу. Дык пакажыце, што такое — сіла народа! Устаньце і пакажыце, што вы за свабоду і дэмакратыю!
Былая ваенная Алена Смолдарава, якая звольнілася пасля 9 жніўня 2020 года, адзначыла:
— Расія вырашыла ўзяць «ДНР» і «ЛНР», наступным іх крокам будзе Сувальскі калідор. Хачу звярнуцца да ваеннаслужачых, якія цяпер знаходзяцца ў Беларусі. Не будзьце трусамі, вас Лукашэнка ўвязаў у такую бойню, што вы пасля за ўсё жыццё не адмыецеся. Як пасля таго, што вы зробіце, будзеце глядзець у вочы сваім дзецям? А дзеці пасля спытаюцца: што вы рабілі, калі вашы браты і сёстры паміралі?
Чытайце таксама
Сёння на Рынку Касцюшкі ў Беластоку адбылася акцыя, дзе жыхары горада выказалі салідарнасць з украінскім народам, які быў сёння атакаваны....
Чытаць далей
Беларуска Кристина открыла в Белостоке студию массажа. Сначала все шло по плану: нашла помещение, воспользовалась налоговой льготой для нового бизнеса,...
Чытаць далей
В Польше по запросу беларусских властей задержали 33-летнего гражданина Беларуси. Мужчина находился в международном розыске по так называемой «красной ноте»...
Чытаць далей
