Некалькі сотняў людзей прыйшлі на святкаванне 104-й гадавіны абвяшчэння Беларускай Народнай Рэспублікі у цэнтры Беластока. У мерапрыемстве таксама прынялі ўдзел кіраўнік Народнага антыкрызіснага ўпраўлення Павел Латушка і лідарка дэмакратычных сіл Беларусі Святлана Ціханоўская.
Урачыстасці пачаліся з ускладання кветак да муроў беластоцкай турмы. Справа ў тым, што тут у 1939 годзе ад рук бальшавікоў загінуў Макар Краўцоў — аўтар гімну БНР «Мы выйдзем шчыльнымі радамі». Пра гэтую гістарычную акалічнасць прысутным распавёў Яўген Вапа, галоўны рэдактар тыднёвіка «Ніва» і дырэктар Радыё Рацыя.
Тут жа Павел Латушка і Святлана Ціханоўская паразмаўлялі з журналістамі. Адным з топавых пытанняў было вызваленне Анжалікі Борыс (дакладней — перавод з турмы пад хатні арышт). Палітыкі адзначылі гэта як пазітыўны крок, але нагадалі пра тысячы іншых палітвязняў, якія застаюцца ў турмах Беларусі.
Прыкладна праз гадзіну мітынг пачаўся ў самым цэнтры Беластока — ля помніка Юзафу Пілсудскаму на Рынку Касцюшкі. Людзі разгарнулі вялікі бел-чырвона-белы сцяг. Багата было і ўкраінскіх сцягоў, а таксама значкоў, плакатаў і расцяжак з беларускай і ўкраінскай сімволікай. Шмат хто прыйшоў з дзецьмі.
У сваёй прамове Латушка правёў гістарычную паралель паміж падзеямі часоў абвяшчэння БНР і нашымі днямі. Таксама палітык адзначыў, што ахвяры, якія зараз нясе беларускі народ, не марныя. Асобна ўзгадаў батальён імя Кастуся Каліноўскага, які зараз змагаецца на баку Украіны.
Ціханоўская казала пра санкцыі як пра моцны аргумент ціску на сённяшняе кіраўніцтва Беларусі.
Цяжка акрэсліць, чаго было больш у поглядах і размовах людзей на мітынгу: святочнай атмасферы або трывогі і напружанасці. Шмат хто з прысутных у Беластоку апынуўся зусім нядаўна — у тым ліку сем’і, якія былі змушаныя выехаць з Украіны праз вайну. Але ў кожным разе мітынг апынуўся не толькі палітычнай падзеяй, але і месцам сустрэчы знаёмых і незнаёмых паміж сабой беларусаў.
