З 1 ліпеня і да канца 2022 года грамадзяне Польшчы могуць перасякаць польска-беларускую мяжу ў пунктах пропуску без візы. Дырэктар турыстычнай фірмы Junior у Беластоку Яўген Лаўранюк падзяліўся з «Радыё Рацыя» сваім меркаваннем пра турызм у Беларусь.
Фірма Junior шмат гадоў арганізоўвала экскурсіі ў Гродна, Мір, Нясвіж, Навагрудак і іншыя беларускія гарады, але цяпер пераключылася на іншыя напрамкі. На гэта паўплывала найперш геапалітычная сітуацыя.
Яўген Лаўранюк кажа, што зараз сітуацыя няпростая для турызму ў Беларусь. Туры ў суседскую краіну ёсць, але попыту няма.
— Ведаем пра гэтыя праблемы з мігрантамі на мяжы, ведаем пра сітуацыю пасля пандэміі — два гады кавіду. Цяпер яшчэ вайна ва Украіне. Усё гэта вельмі моцна ўплывае на развіццё польска-беларускага турызму. Экскурсіі ў Беларусь ёсць на нашым сайце. Раней мы ўсё гэта рабілі для турыстаў з Польшчы, з Беластока, якія часта ездзілі, гэта былі групы з Польшчы. Цяпер попыту на паездкі ў Беларусь няма, яны адзінкавыя. Ёсць пытанні пра санаторыі, але гэта таксама толькі індывідуальныя. Груп, на жаль, цяпер няма, і іх не будзе, пакуль сітуацыя не стабілізуецца. Закрыта Кузніца, закрыта Чарэмха, працуюць толькі Баброўнікі. Пасылаць турыстаў, каб яны стаялі на мяжы 6-7 гадзін, — пасля будуць да нас прэтэнзіі. Пакуль сітуацыя не стабілізуецца з мяжой, з вайной ва Украіне, — такога турызму, як некалі, на жаль, не будзе. Ёсць што ў Беларусі паглядзець, добрыя месцы, добрыя людзі, але зацікаўленасці пакуль няма.
— Ці ёсць зацікаўленасць з іншага боку — з беларускага?
— З беларускага боку ёсць вялікая зацікаўленасць у турыстах з Польшчы, але польскія дыпламатычныя пляцоўкі пакуль не даюць турыстычных віз. Там ёсць гуманітарныя, працоўныя, службовыя, турыстычных яны пакуль не даюць. Таму пакуль не будуць даваць турыстычных віз, таксама вялікай плыні турыстаў не будзе. Ездзяць тыя, у каго былі візы, а такіх сапраўдных турыстаў вельмі мала.
