Палякі часта жартуюць з Падляшша. Жыхары Падляскага ваяводства і самі часцяком любяць уставіць вострае слоўца пра іх родныя мясціны. А з чаго гэта пачалося? MOST расказвае перадгісторыю і паказвае самыя папулярныя мемы пра Падляшша.
Маленькая Расія і падляская гаворка
У жартах і мемах Падляскае ваяводства прадстаўляюць як моцна адсталы рэгіён. Чаму? Бо Падляшша — гэта самы ўсходні рэгіён Польшчы, таму ў жартах мясціны і жыхароў атаясамліваюць са стэрэатыпным вобразам Расіі (забываючыся, што за Падляшшам знаходзіцца Беларусь).
Вобраз Падляскага ваяводства ў мемах — гэта заўсёды вёска, якую вы наўрад ці будзеце адрозніваць ад вёскі беларускай.
Аднак самае яскравае — падляская гаворка. Яе называюць «śledzikowanie»: тут кажуць «dla mnie» і «dla ciebie» замест «mi» і «tobie». Гэта адбылося з-за блізкага суседства з Беларуссю, таму вельмі падобныя словы да нашых у жыхароў Падляшша не рэдкасць.
«Каб не было бандытызму, каб не было крадзяжоў, каб не было нічога»
Падляшша — яшчэ і край мемных персанажаў. Самы знакаміты з іх — Кшыштаф Канановіч. Ён стаў вядомым у 2002 годзе, калі балатаваўся ў прэзідэнты Беластока. Яго перадвыбарнае відэа, у якім ён кажа «каб не было бандытызму, каб не было крадзяжоў, каб не было нічога», стала мемам.
У наступныя гады Канановіч балатаваўся на іншыя сур’ёзныя пасады, у тым ліку хацеў стаць прэзідэнтам футбольнай федэрацыі Польшчы. Канановіч здымаў ролікі, і яны таксама набіралі папулярнасць. Паступова ў відэа сталі з’яўляцца іншыя мемныя персанажы. Адным з іх стаў бездомны Войцех «Маёр» Сухадольскі, якога ў інтэрнэце празвалі «Нітрадольскі», бо той нюхаў растваральнік.
«Як гэта адбылося, я не ведаю»
Яшчэ адным персанажам з’яўляецца спявак Зянон Мартынюк. Ён папулярны артыст у Польшчы ў жанры дыска пола. Дарэчы, паходзіць ён з падляскіх беларусаў. Па яго аўтабіяграфіі «Zenka» быў зняты фільм, якому паставілі вельмі нізкія рэйтынгі, але яго праглядзелі сотні тысяч чалавек. Польскае тэлебачання трансліруе яго канцэрты, а ў Мартынюка нават ёсць уласная лінія энергетычных напояў.
Мемы, звязаныя са спеваком, заснаваныя на цытатах з яго песень. Напрыклад, такіх як «як гэта адбылося, я не ведаю», супастаўленых з адпаведнай жыццёвай сітуацыяй.
А якія мемы пра Падляшша ведаеце вы?
