Беларускія ўлады ўзбудзілі крымінальную справу за хабар супраць польскага дальнабойшчыка. Аб гэтым паведамляе Генпракуратура Беларусі.
12 ліпеня кіроўца-міжнароднік з грузам ехаў з Польшчы ў Беларусь праз пункт пропуску «Казловічы».
У пункце пропуску на мытным кантролі мужчына перадаў беларускаму супрацоўніку хабар у памеры 100 еўра.
Мытнік адмовіўся браць хабар і паведаміў пра сітуацыю сілавікам.
Польскі кіроўца патлумачыў, што дакументы не адпавядалі патрабаванням мытных органаў Беларусі, таму ён і вырашыў даць хабар.
57-гадовага мужчыну ўзялі пад варту. Супраць яго ўзбуджаная крымінальная справа па частцы 1 артыкула 14 і частцы 1 артыкула 431 Крымінальнага кодэкса Беларусі. Яму пагражае да пяці гадоў зняволення.
