Студыя «Беларусьфільм» працуе над нацыянальным фільмам пад рабочай назвай «Мы адзіныя». Стужка будзе прысвечаная «аб’яднанню» Беларусі. Пад «аб’яднаннем» дзяржаўныя прапагандысты маюць на ўвазе савецкую акупацыю Заходняй Беларусі, якая адбылася ў верасні 1939 года ў паразуменні з уладамі нацысцкай Нямеччыны.
Дзеянне фільма будзе пачынацца ў 1925 годзе, які чыноўнікі з дзяржаўнага «Беларусьфільма» акрэсліваюць як «цяжкі час польскай акупацыі». Паводле задумы аўтараў, галоўны герой стужкі, малады беларус Павел Бойка, супрацьстаіць палякам, якія нібыта спрабуюць «выкараніць на захопленых тэрыторыях беларускую культуру, мову, пісьмо, праваслаўную веру».
Генеральны дырэктар «Беларусьфільма» Уладзімір Карачэўскі распавёў дзяржаўным медыя, што мела адбыцца планавая абарона кінапраекта, на якой мусілі прысутнічаць вышэйшыя дзяржаўныя чыноўнікі, уключна з прэм’ер-міністрам Раманам Галоўчанкам.
Аўтарам сцэнарыя і рэжысёрам-пастаноўшчыкам гэтага фільма будзе Іван Крываручка, мастацкім кіраўніком — Аляксандр Яфрэмаў.
Антыпольская і антызаходняя істэрыя
Палітычная і культурная сітуацыя беларусаў у міжваеннай Польшчы была насамрэч складанай, і можна казаць пра дыскрымінацыю беларускай меншасці. Але прапагандыстам, якія ўсё часцей звяртаюцца да гэтай тэмы, ідзецца не пра гістарычную праўду. Яны ўспамінаюць той час, каб раскручваць антыпольскую і антызаходнюю істэрыю ды страшыць тэлегледачоў выдуманымі прэтэнзіямі сучаснай Польшчы на Заходнюю Беларусь.
Лукашэнкаўскія прапагандысты раздзімаюць і перабольшваюць парушэнні правоў беларусаў у міжваеннай Польшчы, але маўчаць пра тэрор, які ў гэты ж час ладзілі камуністы ў БССР. Гэта робіцца для таго, каб апраўдаць тэзіс, што далучэнне Заходняй Беларусі да СССР восенню 1939 года нібыта было «вызваленнем» беларусаў. Праўда, у памяці жыхароў савецкая акупацыя 1939-1941 гадоў запомнілася шматлікімі арыштамі, вывазкамі насельніцтва ў Сібір і расстрэламі вязняў падчас эвакуацыі турмаў у чэрвені 1941 года. Але прапагандысты наглуха замоўчваюць гэтыя падзеі. Відавочна, што і новы фільм будзе зняты ў адпаведнасці з гэтым хлуслівым прапагандысцкім наратывам.
У Польшчы знялі свой фільм пра 1939 год
У верасні ў Польшчы выходзіць у пракат мастацкі фільм «Orlęta Grodno ’39». Карціна раскажа пра маладых гродзенцаў, якія абаранялі родны горад ад савецкай агрэсіі ў верасні 1939 года.
«Усе падзеі ў фільме адбываюцца ў Гродна — сёння гэта Беларусь. Такой карціны яшчэ не было ў польскім кінематографе. У Беларусі здымаць мы не маглі з-за палітычнай сітуацыі. Прыйшлося шукаць падобныя гарады ў Польшчы. Аднаўлялі вуліцы па фатаграфіях і ўспамінах відавочцаў тых падзей», — у 2020 годзе падчас здымкаў распавядаў рэжысёр карціны Кшыштаф Лукашэвіч.
