Актывісты беларускай дыяспары Беластока запісалі відэа з нагоды другой гадавіны пачатку масавых пратэстаў у Беларусі. Гэтае відэа распавядае пра салідарнасць і актыўнасць беларусаў замежжа і тое, што яны рабілі апошнія два гады ў Беластоку.
View this post on Instagram
Прыводзім тэкст звароту беларускай дыяспары:
«Мы — Беларусы Беластока.
Некаторыя з нас тут нарадзіліся, некаторыя — прыехалі ўжо даўно. Шмат хто з нас апынуўся ў Беластоку ў апошнія два гады. Усіх нас аб’яднала новая хваля нацыянальна-вызваленчага руху, якая пачалася летам 2020 года. 9 жніўня мы, як і беларусы ва ўсім свеце, зрабілі свой выбар. Мы выбралі Перамены.
У наступныя дні мы з надзеяй, але і з жахам сачылі за тым, што адбываецца на Радзіме. Мы бясконца ганарыліся беларускім народам, які пачаў адкрытую барацьбу з дыктатурай.
Беларусы Беластока таксама сталі часткай гэтай барацьбы. А з пэўнага часу, калі сказаць альбо зрабіць штосьці ў самой Беларусі стала амаль немагчыма, мы сталіся голасам беларускай грамадзянскай супольнасці.
Што мы рабілі гэтыя два гады? І што мы робім далей? Мы правялі больш за дзве сотні акцый пратэсту і салідарнасці. Мы, як і беларусы ва ўсім свеце, абураліся фальсіфікацыяй выбараў і міліцэйскім гвалтам. Мы распавядалі аб тым, што ў Беларусі дыктатура і “не да законаў”, і настойвалі на прызнанні беларускіх уладаў нелегітымнымі.
Разам з беларусамі па ўсім свеце мы гаравалі пра нашых забітых героях і ўшаноўвалі іх памяць. Голасна казалі і кажам аб тым, што лепшыя людзі нашай краіны сядзяць у турмах за сваё імкненне да свабоды. Мы пішам лісты палітзняволеным, дапамагаем іх сем’ям.
Сваёй актыўнасцю мы трымаем Беларусь у павестцы замежных медыя, а таксама, спадзяемся, падтрымліваем надзею ў саміх беларусах.
Мы пратэстуем супраць ганебнага ўдзелу Беларусі ў вайне ва Украіне. Мы салідарныя з украінскім народам і падзяляем яго боль. Мы дапамагаем украінскім ваярам рэчамі і грашыма. Мы стараемся захоўваць і развіваць беларускую культуру. Мы застаёмся беларусамі і беларусамі выхоўваем нашых дзяцей. Мы трымаемся разам, і салідарнасць для нас — не пусты гук.
Мы запісалі гэтае відэа, каб вы памяталі, што беларусы далей крочаць да сваёй свабоды, што, нягледзячы ні на што, барацьба працягваецца. Мы ўсе — людзі рознага ўзросту, розных прафесій і поглядаў. Але ў нас, як і два гады таму, — агульныя мэты і агульныя мары».
