Гісторыя пра спецслужбы, падман, гвалт, маніпуляцыю і пра цынічнае выкарыстанне курдаў рэжымам Лукашэнкі. Тэлеканал «Белсат» 21 жніўня выпусціў фільм пра мігрантаў, якія апынуліся закладнікамі на беларуска-польскай мяжы.
Сітуацыя паміж Беларуссю і Еўрасаюзам абвастрылася ў чэрвені 2021 года пасля таго, як Лукашэнка загадаў беларускім памежнікам спыніць ахову мяжы ад мігрантаў. Тысячы людзей накіраваліся ў Еўропу. Праз пяць месяцаў няспынных спробаў прарваць мяжу пачалася дээскалацыя напружанасці.
У фільме прыходзяць да высновы, што міграцыйны крызіс быў уступам да поўнамаштабнай вайны Расіі супраць Украіны. Ён быў арганізаваны спецслужбамі рэжыму Лукашэнкі самастойна — альбо пры дапамозе Федэральнай службы бяспекі Расіі.
У якасці экспертаў у фільме выступілі: былы падпалкоўнік беларускай міліцыі, кіраўнік ініцыятывы BYPOL Аляксандр Азараў, які раскрывае сакрэты аперацыі «Шлюз», што выклікала міграцыйны крызіс; польскі даследнік палітыкі Беларусі і Расіі Марэк Будзіш, які напісаў кнігу «Усё ёсць вайна. Расійская стратэгічная культура»; былы прапаршчык беларускай Памежнай службы Іван Страшкевіч.
Падзеі міграцыйнага крызісу пракаментавалі еўрапейскія чыноўнікі розных узроўняў, ад памежніка да міністра. Сваімі драматычнымі гісторыямі падзяліліся і самі мігранты. Яны прызналіся, што зазналі гвалт з боку беларускіх службаў, і дэталёва распавялі, як сілавікі Лукашэнкі маніпулявалі ды падманвалі іх.
Курд Набіль, лідар кульмінацыйнага нападу на польскую мяжу ў лістападзе 2021 года, тлумачыць, чаму курды зрабіліся мігрантамі.
У фільме выкарыстаныя эксклюзіўныя, раней не апублікаваныя відэаматэрыялы з межаў Беларусі і Еўрасаюза. Аўтары фільма вялі здымкі ў закрытых памежных зонах, цэнтрах для мігрантаў у Польшчы і балтыйскіх краінах. Ёсць відэаматэрыялы і з Беларусі, дзе даводзілася здымаць схаванай камерай.
