У студзені 2022 года змянілася кіраўніцтва гродзенскага культурнага цэнтра «Фестывальны». Новы ягоны кіраўнік Эдгар Рэц — асоба, вельмі цесна звязаная з працэсамі гібрыднага распаўсюду «русского мира» ў Беларусі.
Працоўны шлях
Эдгар Рэц — грамадзянін Расіі, які да свайго прызначэння ў «Фестывальны» працаваў у даччыных кампаніях буйных расійскіх карпарацый, у тым ліку «дочак» «Газпрома» і «Альфа Групп». Свой працоўны шлях ён апісаў на сваёй старонцы ў LinkedIn.
Але гэта — далёка не самае важнае. Эдгар Рэц адначасова з працай у «Фестывальным» ёсць прадстаўніком у Беларусі расійскай арганізацыі «Ассоциация предпринимателей Союзного государства». Яна ўзнікла ў 2016 годзе, і з 2017 года да верасня 2021-га ёй кіраваў Генадзь Янкевіч, які, паводле дадзеных старонкі «Міратворац», з’яўляецца супрацоўнікам ГРУ Генштаба Расіі.
У красавіку 2022 года ў размове Эдгара Рэца з журналістам «Гродзенскай праўды» было згадана, што ён з сям’ёй пераехаў у Беларусь шэсць гадоў таму, то бок у 2016-м. Паводле яго сацсетак, ён у гэты час браў удзел у розных мерапрыемствах існуючых у Беларусі структур «Россотрудничества». Напрыклад, у 2019 годзе ён удзельнічаў у так званай «канферэнцыі суайчыннікаў», якую арганізоўваў «Дом Масквы» ў Мінску.
«Русский мир» у «Фестывальным»
Пасля прызначэння Эдгара Рэца ў гродзенскі цэнтр «Фестывальны» арганізатарамі імпрэз цэнтра ўсё часцей сталі з’яўляцца тыя ж згаданыя вышэй структуры «Россотрудничества».
Па-першае, у чэрвені 2022 года прадстаўніцтва «Россотрудничества» ў Беларусі ды гродзенскае аддзяленне ўстановы «Русское общество» правялі ў «Фестывальным» квэст для дзяцей па гісторыі і геаграфіі Беларусі і Расіі.
Па-другое, у ліпені 2022 года ў цэнтры «Фестывальны» адбылося ўзнагароджанне медалямі Расіі «за любоў і вернасць». Дата ўзнагароджання звязаная з афіцыйным расійскім святам «Дзень сям’і, любві і вернасці», якое адзначаецца 8 ліпеня. Паводле палажэння аб гэтым медалю, выбар асобаў для ўзнагароджання здзяйсняюць дыпламатычныя прадстаўніцтвы Расіі за мяжой і «Россотрудничество».
Раней жыхарам Беларусі такія медалі ўручаліся толькі ў Гомельскай вобласці ў «Расійскім цэнтры навукі і культуры», створаным «Россотрудничеством» пры падтрымцы расійскай амбасады.
Такім чынам, гродзенскі цэнтр «Фестывальны» апынуўся прыраўнаваным да структур «Россотрудничества», якое, нагадваем, падпарадкоўваецца расійскаму МЗС. Пры гэтым згаданая культурная ўстанова ёсць філіялам Гродзенскага гарадскога цэнтра культуры, дзяржаўнай установы Беларусі, а значыць, павінна быць арыентаванай на падтрымку ды папулярызацыю беларускай культуры, а не на распаўсюджанне ўплыву краіны-агрэсара.
