Арганізацыя былых беларускіх сілавікоў ByPol ужо некалькі месяцаў рыхтуе беларусаў на тэрыторыі Польшчы, якія пасля едуць бараніць Украіну ад расійскай агрэсіі, а таксама тых, хто гатовы змагацца за незалежнасць сваёй краіны. Ад верасня 2022 года ўсе жадаючыя беларусы на тэрыторыі Польшчы запісваюцца ў спецыялізаваныя харугвы.
Харугвы аб’ядноўваюць беларусаў з буйных дыяспар у Польшчы, якія хочуць вярнуцца на радзіму «ў той момант, калі яны будуць там патрэбныя» для ўдзелу ў «спецыяльных аперацыях, якія намі запланаваныя», — заявіў кіраўнік ByPol, прадстаўнік Аб’яднанага пераходнага кабінету Аляксандр Азараў 4 кастрычніка ў Варшаве падчас сустрэчы Святланы Ціханоўскай з дыяспарай, перадае яго словы праект «Позірк».
«Харугвы — гэта аб’яднанні беларусаў, якія могуць збірацца разам і адчуваць плячо адзін аднаго. Гэта збіранне аднадумцаў, — патлумачыў Азараў. — Ужо каля месяца мы гэтай справай займаемся, выязджалі ў Гданьск, у Беласток, дзе стваралі іх».
Паводле Азарава, удзельнікі падобных аб’яднанняў займаюцца спортам, стралковай падрыхтоўкай, адзінаборствамі і «іншымі спецыяльнымі прадметамі» пад кіраўніцтвам інструктараў. У харугвы могуць уступіць усе жадаючыя беларусы, найбольш падрыхтаваныя з іх пройдуць анкетаванне, верыфікацыю і паліграф для працягу навучання і ўдзелу ў плане «Перамога».
«Мы ўжо каля года з паловай займаемся спецыяльнай падрыхтоўкай беларусаў у межах плана «Перамога». Стаіць вялікая чарга на падрыхтоўку. Яна каштуе вельмі дорага, а сродкаў няшмат. Да нас запісалася 800 чалавек — толькі за тры дні».
Як стала вядома MOST Media, пра беластоцкую харугву пакуль мала інфармацыі, яна на стадыі стварэння і пошуку камандзіра.
