Рымска-каталіцкая парафія святога Сымона і святой Алены атрымала ад прадпрыемства «Мінская спадчына» апавяшчэнне аб скасаванні дамовы беззваротнага карыстання Чырвоным касцёлам у цэнтры беларускай сталіцы. Патрабуюць забраць маёмасць з храма на працягу некалькіх дзён.
Прэсавы сакратар Беларускага каталіцкага касцёла айцец Юры Санько пацвердзіў «Радыё Свабодзе», што такі ліст парафія Чырвонага касцёла атрымала і цяпер рыхтуе адказ, пры гэтым спадзяецца на працяг супрацы.
Улады скасоўваюць дамову неадкладнага карыстання касцёлам з супольнасцю «Рымска-каталіцкая парафія святога Сымона і святой Алены». На імя ксяндза-пробашча Уладзіслава Завальнюка прыйшоў афіцыйны ліст вызваліць касцёл да 12 кастрычніка, з прычыны «немагчымасці яго эксплюатацыі».
Ніякія пратэсты грамадскасці ім не пагражаюць
Беларускі краязнаўца Кастусь Шыталь выказаўся наконт скасавання дамовы з Чырвоным касцёлам.
— Закрыццё Чырвонага касцёла не здзіўляе. Рана ці позна да гэтага павінна было дайсці. Так рабілі ўсе камуністычныя дыктатуры. Спачатку распраўляліся з супрацівам, потым — з іншадумцамі, а потым урэшце браліся за рэлігію. Так было ў нас у 1939 (ксяндзоў і касцёлы спачатку не чапалі), так было ў Польшчы пасля 1945. Доўгі час не разганялі вернікаў царквы «Новае Жыццё», але цяпер ужо пераканаліся, што ніякае абурэнне і пратэсты грамадскасці ім не пагражаюць. Таму наступным крокам зачыняюць Чырвоны касцёл, — распавёў на сваёй старонцы ў Facebook Кастусь Шыталь.
Гісторыя касцёла
Касцёл св. Сымона і св. Алены ў Мінску больш вядомы ў народзе як Чырвоны касцёл. Храм знаходзіцца на плошчы Незалежнасці побач з Домам урада. Ён з’яўляецца адным з сімвалаў сталіцы Беларусі і адным з найвядомейшых хрысціянскіх храмаў краіны.
Будынак касцёла, пабудаваны ў 1910 годзе на сродкі фундатара Эдварда Вайніловіча, пасля здабыцця Беларуссю незалежнасці не перадалі абшчыне, але ён знаходзіўся ў бясплатным карыстанні, у храме праходзілі рымска-каталіцкія і грэка-каталіцкія службы. У 2013 годзе храм быў замацаваны на праве гаспадарчага вядзення за КУП «Мінская спадчына». Менавіта гэтая арганізацыя апавясціла на днях абшчыну вернікаў аб скасаванні дамовы карыстання.
Мерапрыемствы прыпынены
Пажар у касцёле святых Сымона і Алены ў Мінску здарыўся ноччу 26 верасня. Прычынай здарэння стала ўзгаранне электраправодкі, паведаміла МНС Беларусі. У той самы дзень адміністрацыя Маскоўскага раёну Мінску заявіла аб часовым прыпыненні працы касцёла «да ўстаранення ўсіх недахопаў і вынясення заключэнняў кампетэнтнымі спецыялістамі ўсе мерапрыемствы ў Чырвоным касцёле будуць прыпыненыя».
КУП «Мінская спадчына» — дзяржаўная арганізацыя, заснаваная ў 2004 годзе. Заснавальнікам і органам дзяржаўнага кіравання прадпрыемства з’яўляецца Мінскі гарадскі Савет дэпутатаў у асобе Мінскага гарадскога выканаўчага камітэта. Арганізацыя займаецца пытаннямі ўладкавання гістарычнага цэнтру сталіцы, кіраванне і здача ў эксплуатацыю будынкаў у кварталах Верхні горад, Траецкае прадмесце і Ракаўскае прадмесце.
