9 кастрычніка ў Беластоку на Рынку Касцюшкі прайшла акцыя супраць расійскай агрэсіі ва Украіне. Акцыю арганізавала беларуская дыяспара Беластока. Мэта — паказаць, што беларусы не падтрымліваюць дыктатара Лукашэнку, які нядаўна адкрыта прызнаў, што бярэ ўдзел у вайне.
У цэнтр Беластока выйшлі беларусы, украінцы і грамадзяне Польшчы. Усе разам яны трымалі сцягі трох краін і вялікі банер «Разам супраць агрэсіі». Прадстаўнік беларускай дыяспары Беластока Ян Абадоўскі сказаў на акцыі, што вольныя беларусы будуць пратэставаць і выказваць салідарнасць з народам Украіны.
— Мы асуджаем расійскую агрэсію і ваенныя злачынствы. Мы ганарымся беларускімі ваярамі з Палка Каліноўскага, Палка «Пагоня», Батальёна «Тэрор» і іншымі беларусамі-добраахвотнікамі, якія змагаюцца за Украіну і адстойваюць гонар беларусаў. Мы ўсім сэрцам разам з беларускімі рэйкавымі партызанамі, якія атрымалі за сваю дзейнасць вялікія турэмныя тэрміны. Мы зычым перамогі Украіне і марым аб вольнай дэмакратычнай Беларусі, — заявілі ў актыве дыяспары.
У акцыі прынялі ўдзел каля 60 чалавек. Сачыць за жыццём беларускай дыяспары з Беластоку можна ТУТ.
