З дазволу і благаславення Беластоцкага мітрапаліта, арцыбіскупа Юзафа Гуздэка, у Беластоку пачынаюцца штонядзельныя літургіі на беларускай мове для каталікоў. Першая святая Імша ў 2022 годзе адбудзецца 27-га лістапада ў 14:00.
Улетку 2022 года беларусы Беластока збіралі подпісы, каб у касцёлах горада праводзілі імшу на беларускай мове. У выніку быў дадзены дазвол і благаславенне ад Беластоцкага мітрапаліта, арцыбіскупа Юзафа Гуздэка. Беларусы аказаліся ў Беластоку па розных абставінах: хтосьці прыехаў на вучобу, хтосьці — на працу, а нехта быў вымушаны пакінуць радзіму з-за палітычнага пераследу.
Набажэнства на беларускай мове будуць адбывацца ў капліцы Маці Божай Гвадэлупскай па адрасе Wroclawska, 8 (osiedle Zielone Wzgórze). Гэты храм быў пабудаваны ў 2008 годзе. Да парафіі належыць амаль 7 тысяч чалавек.
Першая святая Імша на беларускай мове адбудзецца ў першую нядзелю Адвэнта, 27-га лістапада ў 14:00. Службу будзе праводзіць ксёндз Гжэгаж Балеста.
Гжэгаж Балеста паходзіць з Беласточчыны, з вялікай сям’і, ў якой было ажно 9 дзяцей. Святарскія пасвечанні прыняў у 2002 годзе. У 2009 ён хацеў паехаць працаваць ва Украіну, але біскуп скіраваў яго на працу ў Беларусь. «За гэта я ўдзячны Богу», — узгадаў пазней святар.
У Беларусі арцыбіскуп Тадэвуш Кандрусевіч скіраваў ксяндза Гжэгажа ў вёску Лебедзева. Там святар быў пробашчам да 2016 года, калі без тлумачэння прычын улады не працягнулі яго дазвол на працу святаром. Пасля гэтага ксёндз вярнуўся ў родны Беласток.
«Мы ўдзячныя Богу, што ў Беластоку ёсць святар які працаваў у Беларусі і ахвочы працягваць служэнне беларусам ужо ў Польшчы», — пішуць беларусы-каталікі Беластока.
