11 снежня польская PKP Intercity і літоўская LTG Link запусцілі новае злучэнне Польшчы з Літвой. Цяпер з Вільні можна на цягніку даехаць да Беластока, Варшавы і Кракава.
Цягнікі паміж Літвой і Польшчай ходзяць штодня, праз буйныя гарады па маршруце Вільня – Каўнас – Варшава – Кракаў. Літоўскі цягнік едзе з Вільні праз Каўнас у прымежную Моцкаву. Там будзе чакаць цягнік PKP Intercity. Цягнікі LTG Link і PKP Intercity будуць стаяць на адной платформе. Гэта робіцца для таго, каб пасажырам было зручней перасаджвацца з аднаго на другі. Чакаецца, што паездка з Беластока ў сталіцу Літвы зойме менш за шэсць гадзін, да Варшавы — дзевяць.
Паездка ажыццяўляецца на адным білеце, які можна набыць на сайтах абодвух перавозчыкаў.
Кошт квіткоў
Квіток з Вільні ў Беласток каштуе 18 еўра (85 злотых), у Варшаву — 25 еўра (116 злотых), з Вільні ў Кракаў — 30 еўра (139 злотых). Для дзяцей да 12 гадоў прадугледжаны зніжкі. Правоз ровара каштуе 10 еўра (46 злотых), а правоз жывёлы — 5 еўра (23 злотых).
Часы адпраўлення
Цягнік з Вільні адыходзіць у 12:10, у Моцкаве ён будзе ў 14:41. З Моцкавы да Беластока цягнік ад’язджае ў 15:14. У Беластоку ён у 17:16, у Варшаве — у 20:14.
З Варшавы цягнік адпраўляцца ў 7:35, з Беластока — у 10:46, прыбыццё на перасадачную станцыю Моцкава — 14:41. А далей з Моцкавы да Вільні цягнік адпраўляецца ў 15:05 і прыбывае ў Вільню ў 17:34.
