Ці могуць беларускія спецслужбы выкрасці апанентаў з-за мяжы? «Наша Ніва» запыталася пра гэта ў прадстаўнікоў Аб’яднанага пераходнага кабінета: Аляксандра Азарова з BYPOL і кіраўніка НАУ Паўла Латушкі. Пераказваем гэты тэкст.
Вывезці на машыне: практычна нерэальна, але ёсць нюанс
Аляксандр Азараў лічыць, што выкраданне людзей у замежжы тэарэтычна магчыма, аднак, па яго словах, практычна нерэальна. Азараў падкрэсліў, што машына з выкрадзеным чалавек не зможа праехаць праз памежныя пункты.
— Машыны на дыпламатычных нумарах не даглядаюцца. Але тут пытанне, ці возьме на сябе такую адказнасць супрацоўнік амбасады.
Аляксандр Азараў паведаміў, што ў BYPOL няма інфармацыі, што беларускія спецслужбы збіраюцца выкрадаць людзей з-за мяжы і прывозіць іх у Беларусь, дзе іх завочна судзілі. Азараў кажа, што практычна немагчыма вывезці чалавека з краін Еўрасаюза, але з краіны АДКБ — магчыма.
Азараў адзначыў, што калі чалавека весці пешшу, то гэта будзе фізічна складана для тых, хто будзе збірацца гэтага чалавека вывозіць.
Сцэнарый Пратасевіча: выкраданне і дастаўка ў Беларусь
Павел Латушка лічыць, што рызыка сцэнарыя з выкраданнем і дастаўкай людзей у Беларусь існуе. Па яго словах, гэта персанальная матывацыя Аляксандра Лукашэнкі, і, маўляў, ён такім чынам думае, што наносіць удар па дэмакратычным сілам.
— У сувязі з гэтым і быў рэалізаваны сцэнарый з Пратасевічам, ён прадугледжваў менавіта выкраданне і дастаўку ў Беларусь. Гэта мела некаторыя дэматывуючыя фактары сярод дэмакратычных сілаў.
Латушка мяркуе, што ёсць больш страшны сцэнарый. Ён прадугледжвае фізічную ліквідацыю апанентаў рэжыму Лукашэнкі. Латушка ўзгадвае, што раней у КГБ працавала, і магчыма працуе цяпер, структура, якая адказвала за палітычны пераслед актывістаў за межамі Беларусі.
«Беларускія спецслужбы непрафесійныя, недасведчаныя»
«Наша Ніва» пагутарыла з экспертам польскага Цэнтра ўсходніх даследаванняў Камілям Клысінскім пра магчымасці працы беларускіх спецслужбістаў па выкраданні людзей з Еўрасаюза. Клысінскі лічыць, што ў спецслужбаў Беларусі няма магчымасцяў і сродкаў для арганізацыі выкрадання на тэрыторыі ЕС.
— Магчымасці па выкраданні людзей з ЕС былі ў расійскіх спецслужбаў. Нават хутчэй магчымасці не па выкраданні, а па забойстве. Беларускія спецслужбы непрафесійныя, недасведчаныя. З Пратасевічам яны арганізавалі пасадку самалёта, але гэта зусім іншае.
