Чыноўнікі на Гродзеншчыне лічаць, што правядзенне службаў у касцёлах на польскай мове супярэчыць беларускаму заканадаўству. Пра гісторыю піша каталіцкі партал katolik.life.
28 лютага кіраўніцтва Іўеўскага раёна правяло сустрэчу з мясцовымі святарамі па тэме «развіцця этнаканфесійнай сферы», на якой акцэнт зрабілі на праблемных пытаннях. Адным з такіх праблемных пытанняў назвалі правядзенне ў каталіцкіх парафіях службаў на польскай мове.
— Праблемным застаецца выкарыстанне польскай мовы падчас службаў у каталіцкіх храмах раёна, што недапушчальна згодна з Законам Рэспублікі Беларусь «Аб мовах у Рэспубліцы Беларусь», — заявіла загадчыца сектара ідэалагічнай работы і па справах моладзі Вольга Барко.
У заходняй частцы Беларусі ў касцёлах праводзяць службы на беларускай і польскай мовах — для прадстаўнікоў польскай дыяспары і для тых, хто з дзяцінства маліўся па-польску. Напрыклад, у Іўеўскім касцёле ў нядзелю дзве ранішнія імшы праходзяць на польскай мове (як правіла, з раніцы ў храмы прыходзіць больш старэйшых людзей), а ў абед (для дзяцей і маладых бацькоў) і ўвечары (для моладзі) — на беларускай мове.
Партал katolik.life падкрэслівае, што ў беларускіх касцёлах праводзяць службы не толькі па-польску, але і на англійскай мове для студэнтаў з Азіі і Афрыкі. А выкарыстанне ў літургіі замежнай мовы ніяк не супярэчыць законам Беларусі.
Сярод інфармацыі, якая прагучала на сустрэчы ў райвыканкаме, — правядзенне ідэалагічнымі работнікамі маніторынгу дзейнасці нядзельных школ пры храмах. А прадстаўнік мясцовай міліцыі выказаў гатоўнасць прыходзіць у нядзельныя школы, каб праводзіць прафілактычную работу з дзецьмі па супрацьдзеянні распаўсюджванню наркотыкаў. Гэтую ж тэму прадстаўнік РАУС папрасіў святароў «уключыць у пропаведзі».
