21 мая гістарычны клуб Beer&History правёў тэатралізаваную экскурсію з панам Барташэвічам па шляхецкім Беластоку. MOST паразмаўляў з арганізатарамі і даведаўся, як прайшла першая вандроўка.
«Ідэя існавала шмат год»
У чэрвені 2022 года запрацаваў гістарычны клуб Beer&History — раз на тыдзень праходзілі сустрэчы ў пабе, каб у нязмушанай атмасферы пагутарыць з гісторыкамі і літаратарамі.
— Гэта быў камерны фармат — хацелася выйсці вонкі, у горад. Так з’явілася ідэя экскурсій. Беласток — багаты на гісторыю горад, дзе пераплятаецца польская, беларуская, нямецкая, яўрэйская гісторыя. Хацелася даведацца больш самім ды распавесці пра гэта іншым. Найперш, тым беларусам, якія нядаўна прыехалі і слаба арыентаваліся ў горадзе нават геаграфічна, не тое што гістарычна. Што, уласна, і робім. Аказалася, людзям гэта патрэбна і цікава, — кажа адзін з арганізатараў Алесь Кіркевіч.
Па словах арганізатараў, экскурсію зрабілі таму, што гэта «крута, цікава і незвычайна». Праводзіў вандроўку беларускі акцёр В. Шэры, які мае касцюмы і досвед. Сам акцёр кажа, што ідэя экскурсіі не з’яўлялася — «яна існавала шмат год».
— І не проста існавала — паспяхова рэалізоўвалася як у Беларусі, так і ў шмат якіх турыстычных гарадах Еўропы. Я дакладна ведаю, што ў абласных цэнтрах у апошнія дзесяць год такі фармат экскурсій існаваў паспяхова і вельмі прафесійна. Як у артыстычным складніку, так і гістарычным. Пры гэтым, якасць была агулам настолькі высокая, што амаль не было прафанацыі — канкурэнцыя не дазваляла несумленным выканаўцам і гідам існаваць у гэтай прасторы. І толькі пасля ціску на ўсё недзяржаўнае ў Беларусі, пачалі з’яўляцца дзічэйшыя прафанскія праекты тэатралізаваных экскурсій накшталт падБРСМаўскага «Таемнага горада» у Гродне, — кажа В. Шэры.
Гэтай вясной на вуліцах Беластока можна пабачыць групы людзей, якія спыняюцца каля розных будынкаў і нешта ўважліва слухаюць па-беларуску. Справа...
Чытаць далей«Гэта адназначна не апошняя экскурсія»
На першай экскурсіі сабралося каля 40 чалавек. Людзі рэагавалі вельмі станоўча, былі зацікаўленымі, задавалі пытанні. Па завяршэнні падыходзілі фатаграфавацца і не гледзячы на спёку, частка ўдзельнікаў засталася пасля вандроўкі, каб задаць пытанні і падзяліцца ўражаннямі.
Арганізатары кажуць, што гэта «адназначна не апошняя тэатралізаваная экскурсія».
— Безумоўна, такія экскурсіі плануюцца. Мы распрацоўваем маршруты і ў рамках іншых гістарычных эпох беластоцкага жыцця. Для ўдзелу трэба перш за ўсё быць цікаўным, адсочваць абвесткі ў беларускіх беластоцкіх пабліках.
* * *
Facebook «Экскурсіі Беласток / Wycieczki Białystok»
Instagram «Экскурсіі па Беластоку (і не толькі)»
