Пуцін і Лукашэнка дамовіліся прывезці ў Беларусь расійскую ядзерную зброю. Спыталіся ў людзей на вуліцах Беластока, найбліжэйшага да Беларусі польскага ваяводскага горада, ці з’яўляецца гэтая зброя пагрозай і праблемай для Польшчы? Для Еўрасаюза? Для свету?..
***
— Зразумела, што ёсць небяспека. Беларусь зараз не прымае ўдзел у вайне непасрэдна, хоць фактычна яшчэ як прымае, а Беларусь — гэта таксама наш сусед. Таму тут ёсць яшчэ большая небяспека ў тым, што Польшча можа быць атакавана. Хоць маем надзею, што гэтага не будзе.
— Што з гэтым рабіць польскім вайскоўцам ці палітыкам?
— Мне здаецца, што Польшча таксама павінна неяк дбаць пра бяспеку. Напэўна, так і ёсць: мы дбаем пра бяспеку і недзе там на мяжы з Беларуссю зараз падвышаная гатоўнасць. Маю надзею, што Польшча, у выпадку чаго, будзе ў стане на самым пачатку ўсё адбіць… Калі нешта такое будзе. Але спадзяюся, нічога не будзе.
— Можа, тут, у Польшчы, мусяць з’явіцца амерыканскія ракеты ці нешта падобнае?
— Мы ў НАТА, таму яны павінны нам дапамагчы. Тут няма іншых магчымасцей, бо сама Польшча не мае сродкаў, каб абараніцца ад Беларусі і Расіі. Мы ў НАТА, і ўсё НАТА мусіць быць за намі, падтрымліваць і дапамагаць нам так, як і дагэтуль.
***
— Не ведаю, гэта не да мяне пытанне. Хутчэй да палітыкаў, вайскоўцаў, праўда?
— Але ці змогуць выкарыстаць атамную зброю?
— Думаю, не.
— Тэхнічна не змогуць?
— Думаю, што наўпрост не выкарыстаюць.
***
— Я лічу, што гэта вельмі небяспечна. Гэта небяспека і для Польшчы, і для суседзяў побач з нашай дзяржавай. Тым больш, падазраю, што можа быць Трэцяя [сусветная] вайна на гэты момант… Але маю надзею, што нічога падобнага не адбудзецца.
***
— Ядзерная зброя не павінна распаўсюджвацца ні ў якіх краінах. Яе колькасць там, дзе яна ёсць, мусіць памяншацца, ці наогул трэба пазбавіцца ад яе. Таму, думаю, [шкодна] распаўсюджваць любую ядзерную зброю — ці гэта Беларусь, ці гэта Іран, ці… не ведаю.
***
— Ці з’яўляецца гэта праблемай і небяспекай для Польшчы?
— Канешне, гэта вялікая небяспека.
— А ці могуць Пуцін і Лукашэнка яе выкарыстаць?
— Ці могуць? Могуць.
***
— Праблема? У пэўным сэнсе, і так, і не. З перспектывы для Беларусі і Лукашэнкі — гэта толькі дадатковы аргумент для Пуціна, каб некалі ўвесці туды свае войскі, каб забяспечыць [ахову] сваім узбраенням, лакалізаваным у Беларусі. Але ў значнай ступені гэта не змяняе нашу стратэгічную сітуацыю, бо, калі захочуць яе [атамную зброю] выкарыстаць, то і так выкарыстаюць. Няважна, ці будзе яна ў Беларусі, ці ў якім іншым месцы. На маю думку, гэта толькі элемент забеспячэння інтарэсаў Расіі на тэрыторыі Беларусі.
***
— Можа быць праблема, можа быць… Але не павінна.
— Але ці змогуць атамную зброю выкарыстаць? Альбо гэта элемент запалохвання?
— На дадзены момант — запалохванне, каб Польшча не далучалася [да вайны]. У гэтым сэнс. Каб Польшча не ўлазіла, бо зашмат, магчыма, улазіць. Бо іншыя дзяржавы не ангажаваны настолькі, толькі Польшча.
***
— Трэба думаць, але будзе цяжка!
— Але агулам ці з’яўляецца гэта пагрозай для Польшчы, Еўрасаюза?
— Ёсць пагрозай. Для ўсяго свету гэта пагроза.
***
— У расійцаў ці ў Беларусі — усё адно пагроза, як любая атамная зброя.
***
— Думаю, так. Так.
***
— На маю думку, у сучасным свеце — не.
— Чаму?
— Бо атамная зброя, канвенцыйная ці балістычныя ракеты, можа дзейнічаць з любога месца на зямлі. Будзе гэта на 100 км далей, ці на 100 км бліжэй — няма розніцы…
— У такім разе, навошта гэта аперацыя з перавозам ракет з Расіі ў Беларусь?
— На маю думку, гэта эскалацыя канфлікту. Пагрозы. Падаграванне атмасферы. І ў іх гэта атрымліваецца.
***
— Ці з’яўляецца праблемай тое, што атамная зброя з Расіі хутка будзе ў Беларусі?
— Так.
— Што з гэтым рабіць?
— Не маю паняцця…
