19 жніўня ў Варшаве пройдзе другі Кубак Аляксандра Івуліна — Annual Ivulin’s Cup. Гэта аматарскі турнір па футболе сярод беларусаў у эміграцыі.
Першы футбольны турнір беларускіх аматарскіх каманд Польшчы, арганізаваны ў гонар палітвязня Аляксандра Івуліна, прайшоў 14 жніўня 2022 года ў Варшаве. Тады ў мерапрыемствы ўзялі ўдзел 16 каманд, сфармаваных з беларусаў замежжа. Сёлета арганізатары турніра паведамляюць, што Кубак пройдзе ў падобным фармаце і ўсіх удзельнікаў і заўзятараў на мерапрыемстве чакаюць магчымасці сустрэцца з футбольнымі зоркамі Беларусі.
У Кубку возьме ўдзел і былы палітвязень Аляксандр Івулін. Ён выйшаў на волю ў лютым 2023 года. За кратамі журналіст «Трыбуны» правёў 624 дні.
— Кайфова, калі беларусы аб’ядноўваюцца. Футбол — той сацыяльны клей, які ідэальна для гэтага падыходзіць. Год таму я адчуў неверагодную падтрымку, калі сотні беларусаў ганялі мяч у маю падтрымку. У гэтым хочацца зрабіць тое ж самае, каб аддзячыць хлопцам. Арганізатары абяцаюць навесці прыгажосць, каб беларусы ведалі, што беларус беларусу беларус, — распавёў MOST Аляксандр Івулін.
Кубак Аляксандра Івуліна — Annual Ivulin’s Cup пройдзе ў Варшаве 19 жніўня. Турнір будзе праходзіць на двух міні-футбольных пляцоўках. Зарэгістраваць сваю каманду.
