Пракуроры Польшчы прынялі рашэнне аб аб’яўленні ў вышук беларускіх сілавікоў, якія падазраюцца ў гвалце на тэрыторыі Беларусі. Такое рашэнне было прынятае на падставе заяў людзей, якія пацярпелі ад катаванняў у Беларусі. Пацярпелыя таксама падавалі заявы ў пракуратуры Літвы, Чэхіі, Германіі, Украіны і шэрагу іншых краін.
У адпаведнасці з заканадаўствам Польшчы, сілавікі, на якіх былі ўзбуджаныя крымінальныя справы, могуць быць затрыманыя і прыцягнутыя да крымінальнай адказнасці.
Кіраўнік НАУ Павел Латушка адзначыў, што сітуацыя — сур’ёзны сігнал усёй сілавой сістэме Лукашэнкі.
— Ніхто не сыдзе ад адказнасці, і асобы, якія здзяйснялі і працягваюць здзяйсняць злачынствы супраць чалавечнасці, падлягаюць пераследу практычна ва ўсіх краінах свету і далейшаму пакаранню. Гэтыя справы не маюць тэрміну даўніны, — сказаў ён.
У паведамленні Аб’яднанага пераходнага кабінета адзначана, што такога кшталту заявы пацярпелыя маюць права падаваць фактычна ў любой краіне свету, паколькі катаванні і іншыя жорсткія, бесчалавечныя або зневажальныя годнасць віды абыходжання ўніверсальна забароненыя.
