У Ольштыне адкрылася выстава беларускай мастачкі Ксеніі Ангелавай. Серыя партрэтаў, прысвечаная беларускім палітвязням, экспануецца пад назвай «Беларуская мартыралогія».
Па словах мастачкі, галоўным штуршком для яе стварэння стала забойства маладого мастака Рамана Бандарэнкі.
— Я пачала працу над гэтай серыяй, каб пераадолець цяжар трагічных падзей, якія адбываюцца ў Беларусі ў апошнія тры гады. Я зрабіла ўжо больш за 600 партрэтаў і не збіраюся спыняцца, пакуль не напішу ўсіх тых, хто неправамерна знаходзіцца за кратамі ў Беларусі, — падзялілася Ксенія Ангелава. Яе словы прыводзіць польскае радыё UWMfm.
Пасля пратэстаў 2020 года і ўзмацнення рэпрэсій яна сама з’ехала з Беларусі ў Варшаву.
Выстава працуе ў будынку факультэта гуманітарных навук Вармінска-Мазурскага ўніверсітэта ў Ольштыне. Наведаць яе можна да 4 снежня.
