Жыхары польскай Гайнаўкі сабралі 4384 подпісы за правядзенне мясцовага рэферэндуму пра лёс Белавежскай пушчы. Мінімум для гэтага трэба было сабраць 3500 подпісаў. 29 красавіка заяву перадалі ў староства павета, паведамілі ініцыятары ў Фэйсбуку.
Справу будзе разглядаць новы орган самакіравання павета, бо паўнамоцтвы цяперашняга мінаюць 7 траўня.
На рэферэндуме жыхарам хочуць задаць пытанне, ці падтрымліваюць яны цяперашнюю мадэль кіравання пушчай з захаваннем для мясцовых жыхароў магчымасці карыстацца яе выгодамі.
Нагадаем, у лютым у Сенаце прадставілі комплекс мер па абароне Белавежскай пушчы. Прапанаваны закон узмацняе кантроль за дзейнасцю людзей на тэрыторыі амаль 60 тыс. га. Сярод іншых мер, накіраваных на ахову запаведніка, дакумент прадугледжвае ліквідацыю трох лясніцтваў: у Белавежы, Гайнаўцы і Броўску — і забарону на вядзенне лясной гаспадаркі і палявання на гэтых тэрыторыях.
У Падляскім ваяводстве выступілі супраць такіх захадаў. Людзі, занятыя ў лясной гаспадарцы, баяцца не толькі страціць крыніцу даходу, але і пазбавіцца службовага жылля. Яшчэ ў лютым жыхары выйшлі на пратэст супраць прапанаваных мер, а таксама ініцыявалі правядзенне мясцовага рэферэндуму. Ідэю падтрымалі і ўлады ваяводства.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
