Беларус Юрый Браўэр правёў першы бой у польскай лізе EMC (Early Medieval Clash). У пятнаццацікілаграмовых даспехах ён біўся на рынгу з адным з наймацнейшых польскіх рэканструктараў Міхалам Беднарскім. Свой бой Юрый прайграў, але лічыць добрым вопытам удзел у польскім турніры, які праходзіў 6-7 ліпеня пад замкам Аградзенец. Паядынак беларуса быў абвешчаны галоўным боем вечара.
Юрый займаецца гістарычнай рэканструкцыяй больш за 20 гадоў. У 2022 годзе ён вымушана пакінуў Беларусь. Спачатку жыў у Грузіі, а пасля пераехаў у Польшчу, дзе працягнуў займацца ўлюбёным хобі. У эміграцыі Юрый марыць стварыць беларускі клуб рэканструктараў, а пакуль займаецца ў польскім.
— Арганізацыя турніру была на добрым узроўні, улічваючы, што яны (арганізатары. — Заўв. MOST) не маюць вялікай фінансавай падтрымкі і шмат што робяць толькі праз вялікую асабістую працу. Ды й месца бою было выбрана проста супер — пасярод замка XIII стагоддзя, — расказвае Юрый.
Прыняць удзел у баявым турніры беларусу прапанавалі польскія рэканструктары. Паядынак у новым спартовым кірунку гістарычных баёў — ранняга сярэднявечча. Менавіта такі варыянт для Юрыя быў адносна вядомым, і ён нават вёў у Беларусі адзін бой, які выйграў. Але зараз правілы значна адрозніваліся, што скарачала бонусы ад ранейшага досведу.
Імя суперніка беларусу стала вядома прыкладна за 10 дзён да турніру. Ім стаў вядомы польскі баец Міхал Беднарскі. Ён меў ужо перамогі ў турніры ў падобнай лізе, толькі для рэканструктараў позняга сярэднявечча.
— Спецыяльнай падрыхтоўкі ў мяне не было, бо заставалася мала часу. Правёў дадатковыя трэніроўкі па бегу, бо калі твой супернік бегае паўмарафоны ў брані — значыць, трымацца ён будзе да канца. Бой быў вельмі цяжкім. Супернік вельмі падрыхтаваны і мае антрапаметрычныя бонусы: ён высокі і з доўгімі рукамі.
Посмотреть эту публикацию в Instagram
Яшчэ ў самым пачатку бою Юрый атрымаў моцны ўдар па руцэ. З-за гэтага беларусу было цяжка трымаць меч у наступных раўндах.
— Пасля гэтага падчас бою зламаўся і мой меч. Прыйшлося браць іншы, які ўжо не такі зручны. Але бой прайшоў вельмі файна. Для мяне было гонарам прыняць такі бой, бо астатнія жадаючыя не вельмі хацелі гэта рабіць.
Пасля бою арганізатары прапанавалі Юрыю прыняць удзел у наступным турніры EMC. Беларус спадзяецца, што будзе гатовы. Але каб падрыхтавацца да турніру, ён плануе зрабіць паўнавартасны лагер для падрыхтоўкі.
Не забудзь падпісацца на MOST у Тэлеграм. Мы галоўнае медыя беларусаў у Польшчы.
